(ម៉ូស្គូ)៖ ការបន្តកើនឡើងនៃចំនួនកងកម្លាំងរបស់អង្គការណាតូ (NATO) នៅតាមបណ្តោយព្រំដែនរបស់ប្រទេសរុស្ស៊ី បូករួមទាំងកង្វះខាតនៃកិច្ចពិភាក្សាក្នុងន័យស្ថាបនារវាងរុស្ស៊ី និងសហភាពអឺរ៉ុបថែមទៀតនោះ វាគេចមិនផុតនឹងបង្ខំឲ្យរដ្ឋាភិបាលទីក្រុងម៉ូស្គូអស់ជម្រើស ហើយងាកទៅប្រើចំណាត់ការក្តៅដើម្បីធ្វើការឆ្លើយតបទៅវិញជាក់ជាមិនខាន។ នេះបើតាមការលើកឡើងរបស់ឯកអគ្គរដ្ឋទូតរុស្ស៊ីប្រចាំនៅលីទុយអានី ដែលត្រូវបានដកស្រង់ដោយសារព័ត៌មានរុស្ស៊ី Sputnik នៅព្រឹកថ្ងៃសៅរ៍ ទី១១ ខែកុម្ភៈ ឆ្នាំ២០១៧។
ឯកអគ្គរដ្ឋទូតរុស្ស៊ីលោក Alexander Udaltsov បានថ្លែងយ៉ាងដូច្នេះថា «អង្គការ NATO បាននិងកំពុងបោះមូលដ្ឋានយោធារាប់រយកន្លែងនៅតាមបរិវេណដ៏ធំ ជុំវិញប្រទេសរុស្ស៊ីហើយការកើនឡើងកាន់តែខ្លាំងនៃចំនួនកងកម្លាំងរបស់ NATO នៅក្នុងបណ្តាប្រទេសដែលនៅក្បែរខាងរុស្ស៊ីព្រមទាំងការខ្វះខាតនៃកិច្ចសន្ទនាក្នុងន័យស្ថាបនាជាមួយពួកយើង (រុស្ស៊ី) នឹងបង្ខំឲ្យរដ្ឋាភិបាលទីក្រុងម៉ូស្គូចាត់វិធានក្តៅ ព្រមទាំងតឹងរ៉ឹងដើម្បីតបតទៅវិញមិនខានឡើយ»។
គួរបញ្ជាក់ថាបន្ទាប់ពីវិបត្តិអ៊ុយក្រែនបានបន្តអូសបន្លាយរហូតមក ចាប់តាំងពីឆ្នាំ២០១៤ អង្គការ NATO ក៏បានខិតខំបង្កើនវត្តមានរបស់ខ្លួនជាខ្លាំងនៅតំបន់អឺរ៉ុបខាងកើត ដោយប្រើប្រាស់ការចោទប្រកាន់ដែលថាប្រទេសរុស្ស៊ីបានចូលទៅជ្រៀតជ្រែកក្នុងកិច្ចការផ្ទៃក្នុង របស់ប្រទេសអ៊ុយក្រែនធ្វើជាឈ្នាន់។ ម៉្យាងវិញទៀតរដ្ឋាភិបាលទីក្រុងម៉ូស្គូ ក៏បានសម្តែងការតវ៉ាប្រឆាំងជាច្រើនដងផងដែរ ចំពោះការដំឡើងសាច់ដុំយោធារបស់អង្គការ NATO ដោយសម្អាងថាទង្វើនេះនឹងធ្វើឲ្យប៉ះពាល់ដល់ស្ថិរភាពក្នុងតំបន់ ហើយបណ្តាលឲ្យមានការប្រកួតប្រជែងផ្នែកសព្វាវុធ៕
