(តេហេរ៉ង់)៖ ប្រជាជនអ៊ីរ៉ង់រាប់ម៉ឺននាក់នៅថ្ងៃសុក្រនេះ បាននំាគ្នាចូលរួមក្នុងបុណ្យជាតិដែលជាការប្រារព្ធខួបដ៏ធំអស្ចារ្យនៃ «ជោគជ័យបដិវត្តន៍អ៊ីស្លាមអ៊ីរ៉ង់ឆ្នាំទី៣៨» កាលពីឆ្នាំ១៩៧៩ ដែលនាំអ៊ីរ៉ង់ពីរបបរាជនិយមមកកាន់សករាជថ្មីនៃរបបសាធារណរដ្ឋ នាពេលបច្ចុប្បន្ន។ នេះបើតាមការចេញផ្សាយដោយទីភ្នាក់ងារសារព័ត៌មានចិនស៊ិនហួរ នៅល្ងាចថ្ងៃសុក្រ ទី១០ ខែកុម្ភៈ ឆ្នាំ២០១៧។
យោងតាមប្រព័ន្ធផ្សព្វផ្សាយនៅក្នុងស្រុក ប្រជាជនអ៊ីរ៉ង់នៅតាមបណ្ដាទីក្រុងជាច្រើន បាននាំគ្នាដើរតាមដងផ្លូវ ដោយមានលើកផ្ទំាងរូបថតស្ថាបនិកសាធារណៈរដ្ឋអ៊ីស្លាម លោក Ayatollah Seyed Ruhollah Musavi Khomeini និងអ្នកបន្តវេនពីលោកគឺ លោក Ayatollah Ali Khamenei។ ចំណែកឯនៅក្នុងរដ្ឋធានីតេហេរ៉ង់ មនុស្សម្នាជាច្រើននាក់ក៏បានចូលរួមក្នុងពិធីរំលឹកខួបនេះដែរ ជាមួយនឹងការលើកទង់ជាតិគ្រវីចុះឡើង ក៏ដូចជាការស្រែកពាក្យស្លោកប្រឆាំងសហរដ្ឋអាមេរិក ខណៈអគ្គមគ្គុទេសកំពូល និងប្រធានាធិបតីអ៊ីរ៉ង់ បានអំពាវឱ្យប្រជាជនរបស់ខ្លួន រួបរួមគ្នាទប់ទល់នឹងការគំរាមកំហែងពីសំណាក់សហរដ្ឋអាមេរិកនាពេលថ្មីៗនេះ។
គួររំលឹកថានៅឆ្នាំ១៩៧៩ ប្រជាជនអ៊ីរ៉ង់បានធ្វើបដិវត្តន៍ ផ្ដួលរំលំរបបរាជានិយម Shah គាំទ្រដោយសហរដ្ឋអាមេរិក ហើយចាប់ពីពេលនោះមកដែរទីក្រុងតេហេរ៉ង់ និងទីក្រុងវ៉ាស៊ីនតោនមើលមុខគ្នាមិនចំរហូតមកដល់ពេលបច្ចុប្បន្ន៕
