(​វ៉ាស៊ីនតោន)៖ ពិធីករព័ត៌មាន​នៃសា្ថនីយ៍ទូរទស្សន៍ Fox News លោក បៀល អូរៃលី (Bill O’Reilly) មិនបានសម្ដែង​ការសោកស្ដាយ ឬក៏សុំទោសតាមការចង់បានរបស់រដ្ឋាភិបាល​ទីក្រុងមូស្គូ​នោះទេ​សម្រាប់​ការហៅ​ប្រធានាធិបតី​រុស្ស៊ី លោក វ្ល៉ាឌីមៀ ពូទីន ថាជាឃាតក​នៅអំឡុង​បទសម្ភាសន៍​ជាមួយប្រធានាធិបតី​អាមេរិក​លោក ដូណាល់ ត្រាំ កាលពីចុង​សប្ដាហ៍​កន្លងទៅ។ ប៉ុន្តែព្រមពេល​ជាមួយគ្នា លោក អូរ៉ៃលី បានអះអាងថា​លោកអាចនឹង​គិតគូឡើងវិញ​នៅ​ឆ្នាំ២០២៣។ នេះបើតាមការ​ចេញផ្សាយ​ដោយ​សារព័ត៌មាន Sputnik នៅរសៀលថ្ងៃអង្គារ ទី០៧ ខែកុម្ភៈ ឆ្នាំ២០១៧។

ថ្លែងនៅក្នុង​កម្មវិធី​របស់ខ្លួន​កាលពីថ្ងៃចន្ទ (ម៉ោងនៅក្នុង​ទីក្រុងវ៉ាស៊ីនតោន) លោក​ បៀល អូរៃលី មិនបាន​សុំទោសលោក ពូទីន នោះទេដោយគ្រាន់តែ​លោកបាន​និយាយថា «ជាការពិតណាស់! រដ្ឋបាលលោក ពូទីន ​ក្នុងទីក្រុងមូស្គូ​បានស្នើឱ្យខ្ញុំសុំទោស... ហើយខ្ញុំក៏កំពុង​គិតពីរឿង​សុំទោសនេះដែរ។ ក៏ប៉ុន្តែ​វាអាចនឹងត្រូវ​ចំណាយពេល​វេលា​បន្តិចបន្តួច ពោលគឺចាំ​ដល់ឆ្នាំ២០២៣ ខ្ញុំអាចនឹងពិចារណា​ឡើងវិញ​ម្ដងទៀត»។

គួររំលឹកថា​កាលពីថ្ងៃអាទិត្យ នៅក្នុងបទ​សម្ភាសន៍ជាមួយ លោក ដូណាល់ ត្រាំ លោក បៀល អូរៃលី (Bill O’Reilly) បានលើកឡើងថា លោកពូទីន បាន​សម្លាប់មនុស្ស​ក្រៅប្រព័ន្ធ​តុលាការ​ ក្នុងនោះរួមមាន​ទាំងអ្នកសារព័ត៌មាន និងក្រុមអ្នក​ប្រឆាំងនឹង​រូបលោក។ «គាត់គឺជាឃាតក! ពូទីនគឺជាឃាតក!»។ នេះជាសម្ដីរបស់លោក បៀល អូរៃលី។ សារព័ត៌មានមិនបានបញ្ជាក់ថា តើហេតុអ្វីបានជាត្រូវចាំដល់ឆ្នាំ​២០២៣ ទើបលោក អូរៃលី ព្រមគិតរឿងសុំទោសលោក ពូទីន នោះទេ៕