(ព្រុចសែល)៖ សហភាពអឺរ៉ុបបានអះអាងឡើងវិញថា នឹងមិនទទួលស្គាល់ឡើយថាតំបន់គ្រីមាជារបស់រុស្ស៊ី និងថែមទាំងបានជំរុញឱ្យភាគីពាក់ព័ន្ធទាំងអស់ អនុវត្តន៍យ៉ាងពេញលេញនូវកិច្ចព្រមព្រៀងទីក្រុង Minsk ខណៈអំពើហិង្សានៅភាគខាងកើតប្រទេសអ៊ុយក្រែន បានចាប់ផ្ដើមកក្រើកជាថ្មីនារយៈពេលប៉ុន្មានសប្ដាហ៍ចុងក្រោយនេះ។ នេះបើតាមការចេញផ្សាយដោយទីភ្នាក់ងារសារព័ត៌មានចិន ស៊ិនហួរ នៅព្រឹកថ្ងៃអង្គារ ទី០៧ ខែកុម្ភៈ ឆ្នាំ២០១៧។
ការបញ្ជាក់ពីគោលជំហររបស់សហភាពអឺរ៉ុប ធ្វើឡើងនៅក្នុងឱកាសនៃកិច្ចប្រជុំថ្នាក់រដ្ឋមន្ត្រីការបរទេសអឺរ៉ុបប្រចាំខែ កាលពីថ្ងៃចន្ទនៅឯទីក្រុងព្រុចសែល ប្រទេសប៊ែលហ្សិក។ ជាមួយគ្នានោះដែរថ្លែងនៅក្នុងសន្និសីទសារព័ត៌មាន ក្រោយបញ្ចប់ជំនួបនេះ ប្រមុខការទូតអឺរ៉ុប លោកស្រី Federica Mogherini បានលើកឡើងថា «ស្ថានភាពនៅក្នុងតំបន់ភាគខាងកើតប្រទេសអ៊ុយក្រែន នារយៈពេលប៉ុន្មានថ្ងៃចុងក្រោយនេះ មានសភាពគួរឱ្យព្រួយបារម្ភក្រៃលែងសម្រាប់យើងទាំងអស់គ្នា។ នៅពេលយើងអនុវត្តន៍យ៉ាងពេញលេញនូវកិច្ចព្រមព្រៀងទីក្រុង Minsk នោះយើងអាចនឹងសម្រេចបានការ រំពឹងទុករបស់យើង ក្នុងការបញ្ចប់ជម្លោះព្រមទាំងចាប់ផ្ដើមដំណើរការកិច្ចចរចាសន្តិភាព»។
គួរបញ្ជាក់ថាគិតចាប់តាំងពីខែមេសា ឆ្នាំ២០១៤ មនុស្សជិត១០,០០០នាក់បានស្លាប់ដោយសារតែជម្លោះនៅភាគខាងកើតប្រទេសអ៊ុយក្រែន។ មិនតែប៉ុណ្ណោះវាក៏បានធ្វើឱ្យទីក្រុងមូស្គូ និងអឺរ៉ុបមើលមុខគ្នាមិនចំផងដែរ ជាក់ស្ដែងកាលពីខែកក្កដា និងខែកញ្ញា ឆ្នាំ២០១៤ សហភាពអឺរ៉ុបបាន ដាក់ទណ្ឌកម្មសេដ្ឋកិច្ចប្រឆាំងនឹងរុស្ស៊ីសម្រាប់ការលូកដៃចូលក្នុងជម្លោះរបស់អ៊ុយក្រែន តាមរយៈការគាំទ្រក្រុមឧទ្ទាមបំបែករដ្ឋ ហើយទណ្ឌកម្មនេះទៀតសោតត្រូវបានអូសបន្លាយរយៈពេល៦ខែបន្ថែមទៀតកាលពីចុងខែធ្នូកន្លង ទៅរហូតដល់ខែកក្កដា ឆ្នាំ២០១៧៕
