(វ៉ាស៊ីនតោន)៖ ក្រុមហ៊ុនបច្ចេកវិទ្យាល្បីៗជាច្រើន របស់សហរដ្ឋអាមេរិក រួមមានទំាង ​ក្រុមហ៊ុន Apple, Facebook, Google, Microsoft និង Twitter បានដាក់ញត្តិតវ៉ាមួយ ទៅកាន់តុលាការ ដើម្បីប្រឆាំងជំទាស់នឹងក្រឹត្យ (បទបញ្ជាប្រធានាធិបតី) របស់លោក ដូណាល់ ត្រាំ ស្ដីពីជនអន្តោប្រវេសន៍ និងការហាមឃាត់ជាបណ្ដោះអាសន្នប្រជាជនមកពីបណ្ដាប្រទេសអ្នកកាន់សាសនាអ៊ីស្លាមភាគច្រើនចំនួន៧ (អ៊ីរ៉ង, អ៊ីរាក់, ស៊ីរី, លីប៊ី, សូម៉ាលី,ស៊ូដង់ និងយេមែន) ចូលក្នុងសហរដ្ឋអាមេរិក នេះបើតាមការចេញផ្សាយដោយសារព័ត៌មាន Russian Today នៅថ្ងៃទី០៦ ខែកុម្ភៈ ឆ្នាំ២០១៧។

ញ្ញតិ្តដែលចុះហត្ថាលេខា ដោយអ្នកតំណាងក្រុមហ៊ុនបច្ចេកវិទ្យាជាង ៩៧ ត្រូវបានដាក់ជូនតុលាការឧទ្ធរណ៍ កាលពីយប់ថ្ងៃទី៥ ឈានចូលថ្ងៃចន្ទ ទី៦ ខែកុម្ភៈនេះ បានចោទប្រកាន់វិធានការប្រឆាំងជនអន្តោប្រវេសន៍ និងជនភៀសខ្លួនរបស់លោក ដូណាល់​ ត្រាំ ថានឹងអាចបំផ្លាញយ៉ាងសំខាន់ដល់ពាណិជ្ជកម្ម ព្រមទាំងកំណើនសេដ្ឋកិច្ច និងការទាក់ទាញការវិនិយោគ មកកាន់សហរដ្ឋអាមេរិក។

ក្រុមហ៊ុនដែលបានចុះហត្ថលេខា លើញ្ញត្តិតវ៉ាខាងលើមានដូចជា៖ Apple, Facebook, Google, Microsoft, Twitter, AirBnb, Dropbox, eBay, Intel, Kickstarter, LinkedIn, Lyft, Mozilla, Netflix, PayPal, Uber និងក្រុមហ៊ុន Yelp ដែលសុទ្ធតែមានគោលបំណងរារាំងការអនុវត្តន៍បទបញ្ជា របស់លោក ដូណាល់ ត្រាំ៕