(​ប៉េកាំង)៖ រដ្ឋាភិបាលទីក្រុងប៉េកំាង​គ្រោងនឹងចាត់វិធាន​ការ​ក្ដៅ ក៏ដូចជាសន្យាថានឹងកាត់​បន្ថយការ​ប្រើប្រាស់ធ្យូង​ថ្ម​ឱ្យ​បាន​៣០ភាគរយនៅឆ្នាំ២០១៧នេះ ក្នុងក្របខ័ណ្ឌនៃកិច្ចខិតខំ​ប្រឹងប្រែង​ប្រយុទ្ធប្រឆាំង​នឹង​ការបំពុលខ្យល់អាកាស ក្នុងទីក្រុង​ដែលមាន​ប្រជាជនរស់នៅខ្ទង់ ២១លាននាក់​មួយនេះ។ នេះបើ​តាម​ការចេញផ្សាយដោយ​សារព័ត៌មាន Channel News Asia ​នៅរសៀលថ្ងៃចន្ទ ទី០៦ ​ខែកុម្ភៈ ឆ្នាំ២០១៧។

យោងតាមអភិបាល​ក្រុងប៉េកាំង លោក Cai Qi អាជ្ញាធរចិននឹងអនុវត្តន៍វិធានការពិសេស​សំដៅទប់ស្កាត់ និងកាត់បន្ថយ​ការបំពុលខ្យល់​អាកាស ដោយសារតែ​ការប្រើប្រាស់ធ្យូងថ្ម។​ លោក Cai បានលើកឡើងថា «យើងនឹង​ព្យាយាមកាត់​បន្ថយការប្រើប្រាស់​ធ្យូងថ្ម ត្រឹមកំរិតសូន្យនៅក្នុង​ស្រុកធំៗ​ចំនួន០៦ និងតំបន់​ជាច្រើន​នៃភាគ​ខាងត្បូង​ទីក្រុង​ប៉េកាំង ហើយវិធានការ​ថ្មីនេះ ក៏គ្រោងនឹង​កាត់បន្ថយ​ផងដែរ ការប្រើប្រាស់​ធ្យូងថ្មតិច​ជាង០៧លានតោន ក្នុងឆ្នាំ២០១៧នេះ»។ ទោះបីជាយ៉ាងណា​គេមិនទាន់អាចសន្និដ្ឋាន​បាននៅឡើយទេ ថាការសន្យានេះ​នឹងត្រូវបានអនុវត្ត​ដល់កំរិតណា ខណៈធ្យូងថ្ម​ជាប្រភពថាមពល​ដ៏សំខាន់នៃ​សេដ្ឋកិច្ចចិន។

គួរបញ្ជាក់ថា ដើម្បីទប់ស្កាត់ការបំពុលខ្យល់អាកាស ដែលកំពុងបង្កផលប៉ះពាល់យ៉ាងធ្ងន់ធ្ងរ​ដល់សុខភាព​ប្រជាជនចិន ទីក្រុងប៉េកាំង​បានចាត់វិធានការ​ជាច្រើន ក្នុងនោះរួមមាន​ទាំងការបិទ​រោងចក្រធ្យូងថ្ម​មួយចំនួន និងហាមមិន​ឱ្យរថយន្ដ​ធុនធ្ងន់ ធ្វើចរាចរណ៍​ក្នុងទីក្រុង។ ក្រុមអាជ្ញាធរ​កាលពីដំបូង​ឡើយមាន​បំណងកាត់ បន្ថយ​ការប្រើប្រាស់​ធ្យូងថ្ម​ឱ្យនៅក្រោម​១០លានតោននៅក្នុង​ឆ្នាំនេះ បន្ទាប់ពី​ការប្រើប្រាស់ធ្យូង​ថ្មកាលពីឆ្នាំ២០១៣ មានរហូតដល់​២២លានតោន​ឯណោះ៕