(តូក្យូ)៖ រដ្ឋមន្រ្តីការពារជាតិអាមេរិកលោក James Mattis បានថ្លែងចំៗនៅថ្ងៃសៅរ៍នេះថា ប្រទេសអ៊ីរ៉ង់ គឺជារដ្ឋដ៏ធំជាងគេបំផុតដែលជាអ្ន​កឧបត្ថម្ភដល់ អំពើភេរវកម្ម បន្ទាប់ពីប្រធានាធិបតីលោក ដូណាល់ ត្រាំ បានសម្រេចចិត្តដាក់ទណ្ឌកម្មថ្មីក្តៅៗទៅលើបណ្តាញទិញដូរសព្វាវុធ​របស់​ប្រទេសតំបន់ មជ្ឈឹមបូព៌ាមួយនេះ។ នេះបើតាមការចេញផ្សាយដោយសាព័ត៌មាន Sputnik ចេញផ្សាយនៅរសៀល​ថ្ងៃសៅរ៍ ទី០៤ ខែកុម្ភៈ ឆ្នាំ២០១៧។

«តាមការសម្រេចបានរបស់អ៊ីរ៉ង់ ប្រទេសមួយនេះគឺជារដ្ឋដ៏ធំជាងគេបំផុតតែមួយគត់ ដែលជាអ្នកជួយឧបត្ថម្ភដល់អំពើភេរវកម្មនៅលើពិភព​លោក» នេះតាមសម្តីរបស់លោក James Mattis ដែលបានថ្លែងក្នុងសន្និសីទសារព័ត៌មាននៅឯទីក្រុងតូក្យូ ប៉ុន្តែលោករដ្ឋមន្រ្តីការពារជាតិ​បានបន្ថែមថា សហរដ្ឋអាមេរិក​ពុំមានគំរោងបង្កើនកម្លាំងទ័ព នៅតំបន់មជ្ឈឹមបូព៌ាដើម្បីឆ្លើយតបនោះឡើយ ដោយលើកឡើងដូច្នេះថា «វាមិនមែនជារឿងត្រូវព្រងើយឡើយ ក្នុងការមិនយក​ចិត្តទុកដាក់លើ​សកម្មភាពរបស់អ៊ីរ៉ង់ ប៉ុន្តែស្របពេលជាមួយគ្នាខ្ញុំក៏ពុំឃើញមានពីភាពចាំបាច់នៃកា ​បង្កើនចំនួនទ័ពដែលយើងមាន នៅតំបន់មជ្ឈឹមបូព៌ា​ផងដែរ​នាពេលនេះ ទោះបីជាពួកយើងតែងតែមានសមត្ថភាពធ្វើដូច្នោះយ៉ាងណាក្តី ព្រោះថាឥឡូវនេះខ្ញុំមិនគិតថា វាចាំបាច់ខ្លាំង នោះឡើយ»

ក្រុមមន្រ្តីរបស់សហរដ្ឋអាមេរិកបានអះអាងថា ការដាក់ទណ្ឌកម្មថ្មីទៅលើអ៊ីរ៉ង់ ដែលត្រូវបានប្រកាសនៅថ្ងៃសុក្រម្សិលមិញនេះ គឺជាការ​ឆ្លើយ​តបចំពោះការបាញ់​សាកល្បងមីស៊ីលផ្លោងឆ្លងទ្វីប របស់រដ្ឋាភិបាលទីក្រុងតេហេរ៉ង់កាលពីថ្ងៃអាទិត្យសប្តាហ៍មុន នឹងការគាំទ្ររបស់ខ្លួន​​សម្រាប់ក្រុមឧទ្ទាម Huthi នៅប្រទេសយ៉េមែន ដែលនាពេលថ្មីៗនេះទើបតែបានបាញ់កម្ទេចនាវាចម្បាំងមួយគ្រឿងរបស់រាជាណាចក្រ​  អារ៉ាប៊ី សាអ៊ូឌីត ក៏ប៉ុន្តែវាមិនទាន់មានន័យថា អាមេរិកបានបោះបង់ចោលការប្តេជ្ញា ដែលខ្លួនបានធ្វើឡើងនៅក្រោមកិច្ចព្រមព្រៀង ក្នុង​​ការដកចំណាត់ការមួយចំនួន ដែលសំដៅលើកម្មវិធីនុយក្លេអ៊ែររបសអ៊ីរ៉ង់នោះដែរ។

គួរបញ្ជាក់ថា រដ្ឋាភិបាលអ៊ីរ៉ង់ក៏បានព្រមានថា នឹងចាត់វិធានការប្រឆាំងតបតទៅវិញផងដែរ ចំពោះបញ្ហានៃការដាក់ទណ្ឌកម្មបន្ថែមនេះ ដោយ​បានលើកឡើងថា «ទណ្ឌកម្មថ្មី​នេះ​គឺមិនស្រប​តាមការប្តេជ្ញាចិត្ត​របស់អាមេរិក​នោះឡើយ​ ហើយវាផ្ទុយ​ស្រឡះ​ជាមួយសេចក្តី​សម្រេច​លេខ​២២៣១ របស់ក្រុមប្រឹក្សា​សន្តិសុខនៃ អង្គការ​សហប្រជាជាតិ។ ម៉្យាងវិញទៀត​ការអភិវឌ្ឍ​សមត្ថភាពមីស៊ីល​​នៃ​ប្រទេសអ៊ីរ៉ង់ ដែលត្រូវ​បានរចនាឡើង​ក្នុងគោលបំណង​តែមួយគត់​ គឺសម្រាប់ការ ការពារខ្លួន និងផ្ទុកអាវុធ​ធម្មតាៗ ជាសិទ្ធិអន្តរជាតិ​របស់​ប្រជា​ជាតិ​អ៊ីរ៉ង់​ទាំងមូល ដោយផ្អែកលើ​ច្បាប់របស់​យូអិនប៉ុណ្ណោះ»