(ម៉ូស្គូ)៖​ អគ្គរដ្ឋទូតតួកគី​ប្រចំាប្រទេស​រុស្ស៊ី លោក ហ៊ូសេយីន ឌីរីយ៉ូស (Huseyin Dirioz) បានឱ្យដឹងថា ប្រធានាធិបតីតួកគី លោក រីស៊ីប តយយ៉ីប អឺដូហ្គាន់ គ្រោងនឹង​បំពេញដំណើរទស្សនកិច្ចមកកាន់ទីក្រុងមូស្គូ ដើម្បីចូលរួមក្នុងជំនួបកំពូលមួយ ជាមួយប្រធានាធិបតីរុស្ស៊ី លោកវ្ល៉ាឌីមៀ ពូទីន នៅពាក់កណ្ដាល​ខែមីនា​ខាងមុខនេះ។ នេះបើតាម​ទីភ្នាក់ងារ​សារព័ត៌មាន Interfax ដកស្រង់សម្ដីដោយ​សារព័ត៌មាន Channel News Asia​ នៅថ្ងៃសុក្រ ទី០៣ ខែកុម្ភៈ ឆ្នាំ២០១៧។

យោងតាមលោក ហ៊ូសេយ៉ីន ឌីរីយ៉ូស ​មេដឹកនាំ​ទាំងពីរ នឹងពិភាក្សាគ្នា​ដោយផ្ដោត​សំខាន់លើ​ការលើកកម្ពស់​ទំនាក់ទំនង​ទ្វេភាគី ព្រមទំាង​ប្ដេជ្ញាចិត្តធ្វើការងារ​រួមគ្នា​ផងដែរ សំដៅស្វែង​រកបទឈប់បាញ់​ជាអចិន្ត្រៃយ៍ និងដំណោះស្រាយ​សន្តិភាព​សម្រាប់​ប្រទេសស៊ីរី។   

គួរបញ្ជាក់ថាទំនាក់ទំនង​រវាងតួកគី និងរុស្ស៊ីបានល្អប្រសើរ​ឡើងវិញ កាលពី២០១៦កន្លងទៅ ក្រោយពេល​លោក អឺដូហ្គាន់ បានបង្ហាញការ​សោកស្ដាយ​ និងសូមទោស​ចំពោះការបាញ់​ទម្លាក់យន្ដហោះ​ចម្បាំងរុស្ស៊ី ដោយយោធា​តួកគី​កាលពី​ថ្ងៃទី២៤ ខែវិច្ឆិកា ឆ្នាំ២០១៥ នៅឯតំបន់ក្បែរ​ព្រំដែនជាប់​ប្រទេសស៊ីរី៕