(វៀងច័ន្ទ)៖ រថយន្តទំនើបៗនិងថ្លៃៗបំផុត របស់មន្ត្រីកំពូលៗនៃរដ្ឋាភិបាលឡាវចំនួន ១៥គ្រឿងត្រូវបានរឹបអូស នឹងត្រៀមរៀបចំលក់ចេញនូវសប្តាហ៍នេះ ដែលវាជាផ្នែកមួយនៃកិច្ចខិតខំប្រឹងប្រែងរបស់រដ្ឋាភិបាល ក្នុងការសន្សំសំចៃថវិកាជាតិ និងឈប់ឲ្យមន្ត្រីរបស់ខ្លួនប្រើប្រាស់រថយន្តថ្លៃៗទំនើបៗទៀត។ នេះបើតាមការចេញផ្សាយនៅមុននេះបន្តិច ដោយទីភ្នាក់ងារព័ត៌មានចិនស៊ិនហួរ នាព្រឹកថ្ងៃសុក្រ ទី០៣ ខែកុម្ភៈ ឆ្នាំ២០១៧។
រថយន្តទំនើបៗខាងលើនេះមានដូចជា BMW 7/730li ចំនួន ០៧គ្រឿង និងប្រភេទ Mercedes Benz S350 ចំនួន ០៨គ្រឿង ដែលសុទ្ធសឹងតែជាម៉ាកល្បីលើលោក និងមានតម្លៃថ្លៃផងដែរ។ រថយន្តទាំងអស់កំពុងតែត្រូវបានដាក់តាំងបង្ហាញនៅឯមជ្ឈមណ្ឌលសន្និបាតជាតិ (NCC)។ ការធ្វើនេះត្រូវបានរដ្ឋាភិបាលឡាវអះអាងថា ជាការចាត់វិធានការប្រកបដោយតម្លាភាពបំផុត ដោយអនុឡោមតាមច្បាស់ដែលពាក់ព័ន្ធ។
គួរបញ្ជាក់ថាកាលពីខែមករា នាយករដ្ឋមន្ត្រីឡាវលោក ថុងលួន ស៊ីសួលីត បានចេញនូវអនុក្រឹតមួយដោយធ្វើការកាត់បន្ថយថវិកាចំណាយរបស់រដ្ឋាភិបាលដ៏គួរឲ្យកត់សម្គាល់។ តំណាក់ដំបូងនេះគឺរដ្ឋាភិបាលបានសម្រេចដកហូតរថយន្តទំនើបៗពីមន្ត្រីកម្រិតទី ១ និងទី ២ ខណៈមន្ត្រីតាមលំដាប់ថ្នាក់មួយចំនួនទៀតនឹងត្រូវចាត់ការតាមតំណាក់កាលដែលបានកំណត់រួចជាស្រេចក្នុងអនុក្រឹត៕
