(សេអ៊ូល)៖ រដ្ឋមន្ត្រីការពារជាតិថ្មី ដែលត្រូវបានលោក ដូណាល់ ត្រាំ តែងតាំងនិងទទួលស្គាល់ជាផ្លូវការ​នោះបានមកដល់​ប្រទេសកូរ៉េខាងត្បូង​នៅថ្ងៃព្រហស្បតិ៍ ហើយនៅក្នុងជំនួប​ទល់មុខគ្នា​ជាលើកដំបូង​ជាមួយ​លោករដ្ឋមន្ត្រី​ការពារជាតិកូរ៉េខាងត្បូងនោះ សហរដ្ឋអាមេរិក​ក្នុងអាណត្តិថ្មី​បានព្រមាន​កូរ៉េខាងជើង ដោយ​អះអាងថា «នឹងចាត់ការ​ប្រកបដោយ​ប្រសិទ្ធភាព​ពិតៗ» ប្រសិន​រដ្ឋកុម្មុយនិស្ត​មួយនេះហ៊ាន​ប្រើប្រាស់​អាវុធ​នុយក្លេអ៊ែរ។ នេះបើតាម​ការចេញផ្សាយ​នៅមុននេះបន្តិច ដោយ​សារព័ត៌មាន Channel News Asia នាព្រឹក​ថ្ងៃសុក្រ ទី០៣ ខែកុម្ភៈ ឆ្នាំ២០១៧។

លោក Jim Mattis រដ្ឋមន្ត្រីការពារជាតិសហរដ្ឋអាមេរិក ត្រូវបានគេផ្តល់រហស្សនាមថា «ឆ្កែឆ្កួត» បានអះអាង​នៅចំពោះមុនលោក Hwang Kyo-Ahn រដ្ឋមន្ត្រីការពារជាតិកូរ៉េខាងត្បូង នៅក្នុងជំនួបជាផ្លូវការនាទីក្រុង​សេអ៊ូលថា «ការវាយប្រហារណាមួយ​មកលើ​សហរដ្ឋអាមេរិក ឬក៏សម្ព័ន្ធមិត្តទាំងឡាយ​របស់យើងនោះ ឬក៏ការប្រើប្រាស់អាវុធនុយក្លេអ៊ែរ ប្រទេស​កូរ៉េខាងជើង​នឹងទទួលរងនូវ​ការឆ្លើយតប​ទៅវិញយ៉ាង​ពិតប្រាកដ និងប្រកបដោយប្រសិទ្ធភាព​បំផុត»

គួរបញ្ជាក់ថាដំណើរទស្សនកិច្ចរបស់លោក Mattis មកកាន់កូរ៉េខាងត្បូងពេលនេះ គឺធ្វើឡើងចំពេលដែល​តំបន់ទាំងមូលមានការព្រួយបារម្ភថា កូរ៉េខាងជើងអាចនឹងធ្វើតេស្តគ្រាប់មីស៊ីលប្រភេទថ្មី ដែលមានអានុភាព​ខ្លាំងក្លា ឬក៏អាចជាអាវុធនុយក្លេអ៊ែរផងក៏ថាបានដែរ។ បញ្ហាកូរ៉េខាងជើងនេះ ក៏ស្ថិតនៅក្នុងរបៀបវារ​នយោបាយរបស់លោក ដូណាល់ ត្រាំ ដោយគ្រប់គ្នាកំពុងចាំមើលថា តើលោក ត្រាំ នឹងដោះស្រាយ​បញ្ហាជាមួយកូរ៉េខាងជើងបានយ៉ាងដូចម្តេច។ បន្ទាប់ពីបញ្ចប់ទស្សនកិច្ចនៅទីក្រុងសេអ៊ូល លោក Mattis នឹងបន្តដំណើរទៅបំពេញទស្សនកិច្ចសម្ព័ន្ធមិត្តដ៏ធំបំផុតមួយទៀត គឺទីក្រុងតូក្យូ៕