(យូអិន)៖ អគ្គលេខាធិការនៃអង្គការសហប្រជាជាតិលោក អាន់តូនីញ៉ូ ហ្គូតឺរ៉េស (Antonio Guterres) នៅថ្ងៃពុធសប្តាហ៍នេះបានបង្ហាញពីក្តីព្រួយបារម្ភយ៉ាងក្រៃលែង ជុំវិញផលប៉ះពាល់អវិជ្ជមាននៃគោលនយោបាយអាមេរិកនាពេលថ្មីៗនេះ ដែលបានហាមឃាត់មិនឲ្យជនភៀសខ្លួនមូស្លីមឈានជើងចូលប្រទេសនៅតំបន់អាមេរិកខាងជើងមួយនេះតទៀតឡើយ ដោយលោក ហ្គូតឺរ៉េស បានលើកឡើងថា វិធានការនេះគួរតែត្រូវដកចេញវិញឲ្យបានឆាប់ទើបល្អ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនាព្រឹកថ្ងៃព្រហស្បតិ៍ ទី០២ ខែកុម្ភៈ ឆ្នាំ២០១៧។
ជាការឆ្លើយតបទៅនឹងការផ្លាស់ប្តូរនយោបាយអាមេរិកនាពេលថ្មីៗនេះ ជុំវិញកម្មវិធីជនភៀសខ្លួនដែលមានអាយុកាលយូរណាស់មកហើយនេះ លោក Antonio Guterres បានថ្លែងទៅកាន់ក្រុមអ្នកសារព័ត៌មានថា ការតាំងទីលំនៅថ្មីគឺជា «ដំណោះស្រាយដែលអាចទៅរួចតែមួយគត់» សម្រាប់ជនទាំងឡាយណា ដែលបានសម្រេចភៀសខ្លួនចេញពីសង្រ្គាម និងជម្លោះនៅក្នុងប្រទេសកំណើតរបស់ពួកគេ ហើយការហាមឃាត់ជនទាំងអស់នោះ ពិតជាជះផលប៉ះពាល់យ៉ាងខ្លាំងដល់ជីវិតរស់នៅរបស់ពួកគេ។
គួរបញ្ជាក់ថាប្រធានាធិបតីអាមេរិកលោក ដូណាល់ ត្រាំ បានសម្រេចចេញបម្រាមហាមឃាត់ជនភៀសខ្លួនចូលមកកាន់សហរដ្ឋអាមេរិកចំនួន០៤ខែ និងផ្អាកជាបណ្តោះអាសន្ននូវអ្នកដំណើរ ឬទេសចរមកពីបណ្តាប្រទេសម៉ូស្លីមចំនួន០៧ ដូចជា ស៊ីរី, អ៊ីរ៉ង់, អ៊ីរ៉ាក់, លីប៊ី, សូម៉ាលី, ស៊ូដង់, និងយ៉េមែន ដែលមានរយៈពេល៩០ថ្ងៃ។ ដោយឡែកជនភៀសមកពីបណ្តាប្រទេសជាច្រើនទៀតត្រូវបានហាមឃាត់មិនឲ្យចូលទឹកដីអាមេរិកក្នុងរយៈពេល ១២០ថ្ងៃ ប៉ុន្តែសម្រាប់ជនភៀសខ្លួនស៊ីរីវិញ គឺត្រូវបានហាមឃាត់ដោយគ្មានពេលកំណត់។ លោក ត្រាំ បានបញ្ជាក់ថាវិធានការថ្មីនេះគឺដើម្បីការពារសន្តិសុខនៅក្នុងសហរដ្ឋអាមេរិក ពីសំណាក់ពួកភេរវកររ៉ាឌីកាល់អ៊ីស្លាម។
ដោយឡែកវាជារឿងមិនអាចជៀសផុតនោះឡើយ ដោយចំណាត់ការក្តៅដែលដាក់ចេញដោយលោក ដូណាល់ ត្រាំ មិនបានប៉ុន្មានផងបានបង្កើតឡើងនូវការតវ៉ាប្រឆាំងយ៉ាងកក្រើក ពីសំណាក់ជនភៀសខ្លួនមកពីបណ្តាប្រទេសនានាដែលកកកុញ នៅព្រលានយន្តហោះអន្តរជាតិទូទាំងសហរដ្ឋអាមេរិក ដើម្បីប្រឆាំងទៅនឹងបទបញ្ជាហាមឃាត់ជនភៀសខ្លួនចូលទឹកដីអាមេរិកជាបណ្តោះអាសន្ននោះ៕
