(គូឡាឡាំពួរ)៖ នៅថ្ងៃណាមួយដែលក្រុម ISIS បាត់បង់ទឹកដី ឬបរាជ័យនៅក្នុងប្រទេសស៊ីរី និងអ៊ីរ៉ាក់ ក្រុមសកម្មប្រយុទ្ធមួយនេះ នឹងបែកខ្ចាត់ខ្ចាយ ឬក៏រត់ភៀសខ្លួនទៅកាន់បណ្ដាប្រទេសជាច្រើននៅទូទាំងពិភពលោក ជាទីដែលពួកគេនឹងសម្របខ្លួនទៅតាមសង្គម មុននឹងធ្វើសកម្មភាពវាយប្រហារភេរវកម្មថ្មីទៀត។ នេះគឺជាការព្រមានរបស់អតីតមេបញ្ជាការប៉ូលិសប្រឆាំងភេរវកម្មតួកគី លោក Ahmet S. Yayla ដកស្រង់ដោយសារព័ត៌មាន Channel News Asia នៅព្រឹកថ្ងៃពុធ ទី០១ ខែកុម្ភៈ ឆ្នាំ២០១៧។
ថ្លែងនៅក្នុងសម្ភាសន៍មួយកាលពីសប្ដាហ៍មុន លោក Ahmet S. Yayla បានលើកឡើងដូច្នេះថា៖« ក្រុម ISIS កំពុងប្រឈមមុខនឹងការបាត់បង់ទីក្រុង Raqqa និង ទីក្រុង Mosul។ ក៏ប៉ុន្តែបើសិនជារឿងនេះកើតឡើងពិតមែន នោះការបង្ហូរឈាមក៏អាចនឹងកើតឡើងសាជាថ្មីផងដែរ ត្បិតក្រុមសកម្មប្រយុទ្ធរបស់ពួកគេនឹងត្រូវបែកខ្ចាត់ខ្ចាយ ឬក៏រត់ភៀសខ្លួននៅទូទាំងពិភពលោក ក៏ដូចជាធ្វើការសម្របខ្លួនទៅតាមសង្គមដែលពួកគេរស់នៅ ដើម្បីដឹកនាំសកម្មភាពវាយប្រហារភេរវកម្មនៅ តាមបណ្ដាប្រទេសក្នុងទ្វីបអាស៊ី និងអឺរ៉ុប។ ជាងនេះទៅទៀត បច្ចុប្បន្នអ្នកអាចទម្លាក់គ្រាប់បែកលើក្រុម ISIS ពីព្រោះអ្នកមើលឃើញពួកគេ ក៏ប៉ុន្តែនៅថ្ងៃណាមួយ ដែលក្រុមភេរវករអន្តរជាតិមួយនេះបាត់បង់ទឹកដី នោះអ្នកនឹងមិនងាយស្រួលក្នុងការស្វែងរកពួកគេទៀតនោះទេ»។
គួររំលឹកថាកងកម្លាំងរដ្ឋាភិបាលអ៊ីរ៉ាក់ បានដាក់ចេញនូវប្រតិបត្តិការយោធាវាយយកទីក្រុង Mosul កាលពីខែតុលា ឆ្នាំ២០១៦ ហើយព្រមពេលជាមួយគ្នានោះដែរ មេដឹកនាំ ISIS លោក Abu Bakr al-Baghdadi ធ្លាប់បានប្រកាសសងសឹកនឹងបណ្ដាប្រទេសលោកខាងលិច តាមរយៈការអំពាវនាវឱ្យក្រុមសកម្មប្រយុទ្ធរបស់ខ្លួនដឹកនាំសកម្មភាពវាយប្រហារភេរវកម្ម ដើម្បីប្រែក្លាយទ្វីបអឺរ៉ុបទៅជាថ្លុកឈាម៕
