(ម៉ូស្គូ)៖ កងឧទ្ធម្ភាគចក្រ​ចម្បាំងធុន Mi-24 របស់ប្រទេសរុស្ស៊ី​ដែលមកពីមូលដ្ឋានទ័ព​អាកាស Tolmachevo បានធ្វើ​សមយុទ្ធយោធា​តាមផ្លូវអាកាស នៅវាលហ្វឹកហ្វឺនក្នុងតំបន់ Novosibirsk ភាគកណ្តាលប្រទេស។ នេះបើតាម​ការចេញផ្សាយ​ដោយ​ ទីភ្នាក់ងារព័ត៌មាន​ចិន​ស៊ិនហួរ នៅមុននេះបន្តិច​នារសៀល​ថ្ងៃអង្គារ ទី៣១ ខែមករា ឆ្នាំ២០១៧។

យោងតាមអ្នកនាំពាក្យ​ទីបញ្ជាការ​យោធា​ភាគកណ្តាល​របស់​ប្រទេសរុស្ស៊ី ការធ្វើសមយុទ្ធ​ខាងលើបាន​ប្រព្រឹត្ត​ទៅ​ដោយ​ជោគជ័យ និងប្រកប​​ដោយ​ប្រសិទ្ធភាព​បំផុត ដោយ​ក្រុមអាកាស​យានិក​បានបញ្ជា​ឧទ្ធម្ភាគចក្រ​របស់ពួកគេ​យ៉ាងស្ទាត់​ជំនាញ និងបានធ្វើ​ការវាយលុក​ចំគោលដៅ​​ច្បាស់ៗ​ គ្មានខុសអ្វីបន្តិច​នោះ​ឡើយ។

ក្រៅពីនេះកង​ឧទ្ធម្ភាគចក្រ​ចម្បាំង​រុស្ស៊ីធុន Mi-24 ដ៏មានអនុភាព​បានធ្វើការហ្វឹកហ្វាត់​ចុះចតក៏​ដូច​ជា​ហោះឆ្លបយកការណ៍​ព្រមទាំង និងធ្វើជា​អ្នកគាំទ្រ​កងអង្គភាព​យានយន្ត​ពីលើផ្ទៃ​អាកាស​ បានយ៉ាង​រលូនថែម​ទៀតផង។ គួរបញ្ជាក់ថាសម​យុទ្ធ​ថ្មី​នេះ​មាន​ការចូលរួមពីសំណាក់ឧទ្ធម្ភាគចក្រចំនួន១០គ្រឿង និងមនុស្ស​ចំនួន​ជិត៥០នាក់។ សមយុទ្ធនានានៅតែបន្តធ្វើឡើង ដោយសារតែបណ្តាប្រទេសនៅអឺរ៉ុប នៅតែបន្តការ​ដាក់ពង្រាយកងទ័ពក្បែរព្រំដែនរុស្ស៊ីនៅឡើយ៕