(​ម៉ានីល)៖ អគ្គរដ្ឋទូត​អាមេរិកប្រចាំ​ប្រទេសហ្វីលីពីន បានច្រានចោល​ការចោទប្រកាន់របស់​ប្រធានាធិបតី​ហ្វីលីពីន រ៉ូឌ្រីហ្គោ ឌូតើ​តេ ដែលថា​កងទ័ពអាមេរិក​បានសាងសង់ ឃ្លាំងអាវុធ​ក្នុងមូលដ្ឋានទ័ព​ចំនួន០៥ នៅលើទឹកដីហ្វីលីពីន​ ដោយរំលោភ​លើកិច្ចព្រមព្រៀង​យោធា​អាមេរិក-ហ្វីលីពីន។ នេះបើតាម​ការចេញ​ផ្សាយ​ដោយ​សារព័ត៌មាន Channel News Asia​ នៅរសៀលថ្ងៃអង្គារ ទី៣១ ខែមករា ឆ្នាំ២០១៧។

លោក ឌូតើតេ កាលពី​ថ្ងៃអាទិត្យកន្លងទៅ​បាននិយាយដោយ​ឥតលាក់​លៀមថា សហរដ្ឋអាមេរិក​បានស្ដុក​ទុក​សព្វាវុធជាច្រើន ក្នុងរួមមានទាំងរថក្រោះផងដែរ​នៅឯតំបន់ចំនួន០៣នៅក្នុងប្រទេសហ្វីលីពីន ដែលនេះ​អាចនឹងធ្វើ​ឱ្យចិន​ក្ដៅក្រហាយ ក៏ដូចជានាំ​ប្រទេសរបស់​លោក​ធ្លាក់ចូល​ក្នុងរណ្ដៅ​គ្រោះថ្នាក់ ហើយ​លោកប្រធានាធិបតី​រូបនេះ ក៏បានព្រមានជាថ្មីម្ដង​ទៀតផងដែរ​ថា នឹងលុបចោល​កិច្ចព្រមព្រៀង​យោធា​រវាង​ប្រទេសទាំងពីរ។  

អគ្គរដ្ឋទូតអាមេរិក​ប្រចាំទីក្រុង​ម៉ានីល លោក ស៊ុង គីម (Sung Kim) បានច្រានចោល​ចំពោះ​ការចោទ​ប្រកាន់​នេះ។ លោក​ គីម បានលើកឡើង​នៅក្នុងវេទិកា​ពាណិជ្ជកម្ម Makati Business Club នៅថ្ងៃ​អង្គារនេះ ដូច្នេះថា «យើងមិនបានសាងសង់ឃ្លាំង ឬក៏ស្ដុកអាវុធនៅលើទឹកដីហ្វីលីពីននោះទេ (...) ពោលគឺ​សហរដ្ឋអាមេរិក​មិនអាចកសាងឃ្លាំងអាវុធ ដោយគ្មានការយល់ព្រមពីរដ្ឋាភិបាលហ្វីលីពីន​​បាននោះ​ឡើយ។ ជាងនេះទៅ​ទៀតការកសាង​ទាំងឡាយ​ ក៏មិនមាន​ជាប់ពាក់ព័ន្ធ​នឹងអាវុធដែរ តែដើម្បី​រក្សាទុក​សម្ភារៈសម្រាប់​ឆ្លើយតប​ទៅ​នឹង​​គ្រោះមហន្តរាយ​ប៉ុណ្ណោះ »

គួរបញ្ជាក់ថា​ប្រធានាធិបតី​ហ្វីលីពីន លោក​ រ៉ូឌ្រីហ្គោ ឌូតើតេ ធ្លាប់បាននិយាយថា​លោកពិតជាស្អប់ ដែលកងទ័ព​អាមេរិក​មានវត្តមាន​នៅលើទឹកដី​ហ្វីលីពីន ស្របពេល​ដែលលោកបាន​បង្ហាញពី​ទំនោរ​ងាកទៅចិន​កាន់តែខ្លាំង បើទោះជា​ប្រទេសទាំងពីរ​កំពុង​មានជម្លោះ​ដែនទឹក នៅតំបន់​សមុទ្រចិន​ខាងត្បូង​ក៏ដោយ៕