(គូឡាឡាំពួរ)៖ ភ្ញៀវទេសចរជនជាតិចិនឈ្មោះ Fan Li Xia និងអ្នកដំណើរដទៃៗទៀតបានធ្វើការរៀបរាប់ឲ្យដឹងពីស្ថានភាពក្រោយពេលដែលទូកទេសចរណ៍របស់ពួកគេ បានលិចនៅកណ្តាលសមុទ្រចិនខាងត្បូងដ៏ត្រជាក់។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនារសៀលថ្ងៃអង្គារ ទី៣១ ខែមករា ឆ្នាំ២០១៧។
យោងតាមអ្នកនាង Fan Li Xia មុនពេលត្រូវបានជួយសង្រ្គោះក្រុមអ្នកធ្វើដំណើរនៅលើទូកទេសចរណ៍ខាងលើដែលបានលិចដោយសារត្រូវចរន្តទឹកសមុទ្របោកបក់ ហើយបានស្ថិតនៅក្នុងផ្ទៃទឹកដ៏ត្រជាក់ជាមួយនិងស្ថានភាពលំបាកលំបិនជាខ្លាំង អស់រយៈពេលជាង៣០ម៉ោង។ ប្រាប់ទៅកាន់ក្រុមអ្នកសារព័ត៌មាននៅឯមន្ទីរពេទ្យមួយកន្លែងក្នុងទីក្រុង Kota Kinabalu នៃរដ្ឋ Sabah លើកោះ Borneo ប្រទេសម៉ាឡេស៊ី អ្នកនាង Fan បាននិយាយថា «បើសិនជាពួកយើងត្រូវបានគេរកឃើញ និងជួយសង្រ្គោះ ហើយបើយឺតជាងនេះតែបន្តិច ខ្ញុំមិនគិតខ្ញុំនឹងនៅមានជីវិតរស់នោះឡើយ។ មិត្តភក្តិរបស់ខ្ញុំបានបាត់បង់ជីវិត ហើយពួកយើងបានមើលរក្សាសាកសពរបស់គេ នៅក្បែរជាប់ជានិច្ចអស់រយៈពេលកន្លះថ្ងៃ ប៉ុន្តែដោយសារពួកយើងមិនអាចស៊ូទ្រាំតទៀតបាន ក៏សម្រេចចិត្តព្រលែងសាកសពនោះចោលតែម្តងទៅ»។
អ្នករួមដំណើរដែលនៅមានជីវិតម្នាក់ទៀតឈ្មោះ Yang Yaoru ក៏បានឲ្យដឹងដែរថា ឆន្ទៈសាមគ្គីគ្នារបស់ពួកគេបានជួយពួកគេអត់ធន់នឹងផ្ទៃទឹកសមុទ្រដ៏ត្រជាក់។ ពួកគេបានចែករំលែកអាហារដ៏តិចតួចស្តួចស្តើងដែលពួកគេមាន និងបានជំរុញលើកចិត្តគ្នាទៅវិញទៅមក ដើម្បីធ្វើយ៉ាងណាឲ្យនៅរស់រានមានជីវិត។
អ្នកនាង Yang ដែលបានធ្វើដំណើរកម្សាន្តជាមួយម្តាយ បានបន្ថែមទៀតថា អ្នកដែលរួចជិវិតទាំងប៉ុន្មានបានផ្តុំអោបគ្នាដើម្បីតស៊ូនឹងធាតុត្រជាក់ និងមានក្តីព្រួយបារម្ភចំពោះម្តាយជាខ្លាំងព្រោះគាត់មិនសូវចេះហែលទឹកនោះឡើយ ដោយអ្នកនាងបាននិយាយថា «បើសិនជាខ្ញុំស្លាប់ ម្តាយរបស់ខ្ញុំប្រហែលមិនអាចពុះពារឲ្យរួចជីវិតដោយខ្លួនឯងបាននោះឡើយ»។
គួរបញ្ជាក់ថាទូកទេសចរណ៍មួយគ្រឿងផ្ទុកអ្នកទេសចរជនជាតិចិនចំនួន២៧នាក់ និងអ្នកបម្រើការលើទូកក៏ដូចជាអ្នកបើកបរចំនួនបីនាក់ទៀត ដើម្បីធ្វើដំណើរកម្សាន្តនៅក្នុងឱកាសបុណ្យចូលឆ្នាំថ្មីប្រពៃណីចិននោះ បានលិចកាលពីព្រឹកថ្ងៃសៅរ៍សប្តាហ៍មុននេះ នៅក្បែរឆ្នេរសមុទ្រនៃកោះ Borneo បន្ទាប់ពីបានជួបប្រទះនូវរលកបោកបក់ធំៗ ខណៈកំពុងឆ្ពោះទៅកាន់កោះលំហែកាយ Mengalum ដ៏មានប្រជាប្រិយរបស់ប្រទេសម៉ាឡេស៊ី។
ក្រោយមកនៅថ្ងៃអាទិត្យសប្តាហ៍ដដែលភ្ញៀវទេសចរចំនួនបីនាក់ ត្រូវគេរកឃើញថាបានស្លាប់ស្របពេលដែលមនុស្សចំនួន២២នាក់ រួមបញ្ចូលទាំងអ្នកបើកបរត្រូវបានជួយសង្រ្គោះដោយក្រុមអ្នកនេសាទនិងនាវាសន្តោង ដោយពួកគេភាគច្រើនមានហូរឈាមចេញមក និងរងការរលាកកម្តៅថ្ងៃធ្ងន់ធ្ងរយ៉ាងខ្លាំង ហើយមកទល់រសៀលថ្ងៃអង្គារនេះ នាវាយោធានិងយន្តហោះរបស់ប្រទេសម៉ាឡេស៊ី កំពុងតែបន្តឆ្វែលដែនសមុទ្រកើតហេតុ ដើម្បីស្វែងរកមនុស្សចំនួនប្រាំនាក់ផ្សេងទៀតរួមមានភ្ញៀវទេសចរបួននាក់ និងអ្នកបម្រើការលើទូកទេសចរខាងលើម្នាក់ ដែលនៅតែបន្តបាត់ខ្លួនពុំទាន់ត្រូវបានរកឃើញនៅឡើយ៕
