(អង់ការ៉ា)៖ ប្រទេសតួកគី​បានសម្រេចបើកស្ថានទូត​របស់ខ្លួនឡើងវិញ​ នៅក្នុងរដ្ឋធានីទ្រីប៉ូលី (​Tripoli) នៃប្រទេសលីប៊ី​ បន្ទាប់​ពី​បានបិទទ្វារអស់រយៈពេល​ជាងពីរ​ឆ្នាំកន្លងមក ដោយសារតែបញ្ហាអសន្តិសុខ​នៅក្នុងប្រទេសអាហ្វ្រិក​ខាងជើងមួយនេះ។ នេះបើតាម​សេចក្តីប្រកាស​របស់ក្រសួង​ការបរទេស​តួកគី ដែលដកស្រង់​ដោយទីភ្នាក់ងារ​​ព័ត៌​មានចិនស៊ិនហួ នៅមុននេះបន្តិចនាព្រឹកថ្ងៃអង្គារ ទី៣១ ខែមករា ឆ្នាំ២០១៧។

យោងតាមសេចក្តី​​ថ្លែងការណ៍​នៅលើគេហទំព័រ​របស់ក្រសួង​ខាងលើ​ សកម្មភាព​នានា​នៃស្ថានទូតតួកគី​ប្រចាំ​ប្រទេស​លីប៊ី នៅទីក្រុង​ទ្រីប៉ូលី បានចាប់​ផ្តើមដំណើរ​ការសាជាថ្មី​ហើយ ជាមួយ​និងបុគ្គលិក​មានចំនួនតិចតួច​​នៅក្នុងដំណាក់កាល​ដំបូង ហើយប្រការ​នេះនឹង​អនុញ្ញាត​ឲ្យ​ប្រទេសតួកគី​ធ្វើការចូលរួមចំណែក​បានធំជាងមុន ក្នុងការកសាងសន្តិភាព​ និងស្ថិរភាព​ក៏ដូចជា​ការស្ថាបនា​ឡើងវិញ​នៅលីប៊ី។

គួរបញ្ជាក់ថា​តួកគីបានបិទស្ថានទូត​របស់ខ្លួន​ ដែលស្ថិតនៅក្នុង​រដ្ឋធានីទី្រប៉ូលី និងស្ថាន​កុងស៊ុល​នៅទីក្រុង​បេងហ្គាស៊ី​ (Benghazi) ដោយ​សារ​តែ​​ហេតុ​ផល​សន្តិ​សុខកាលពីឆ្នាំ២០១៤ ខណៈពេល​ស្ថានកុងស៊ុល​របស់ខ្លួនមួយ​កន្លែងទៀត​ នៅក្រុងមីស្រាតា (Misrata) ដែល​ស្ថិតនៅភាគពាយ័ព្យ​ប្រទេសលីប៊ី នៅតែបន្តបើក​ដំណើរការ​ជាធម្មតា៕