(វ៉ាស៊ីនតោន)៖ អគ្គរដ្ឋអាជ្ញា​កំពូលនៃរដ្ឋធានីវ៉ាស៊ីនតោន បានសម្រេចចិត្ត​ដាក់ពាក្យបណ្ដឹង នៅថ្ងៃចន្ទ ដើម្បីប្ដឹងជំទាស់ទៅនឹង​អ្វីដែលពួកគេហៅថា​ ជាការហាមឃាត់ដោយខុសច្បាប់ និងផ្ទុយពីរដ្ឋធម្មនុញ្ញ ពីសំណាក់​ប្រធានាធិបតីអាមេរិក លោក ដូណាល់ ត្រាំ លើការធ្វើដំណើរ របស់ប្រជាជនពីប្រទេស​​ម៉ូស្លីមចំនួន០៧ មកកាន់សហរដ្ឋអាមេរិក ដោយថែមទាំងស្នើ​ឱ្យលុបចោលបទបញ្ជានេះ​ជាបន្ទាន់​ទៀតផង។ នេះបើតាម​ការចេញផ្សាយដោយ សារព័ត៌មាន Channel News Asia​ នៅព្រឹកថ្ងៃអង្គារ ទី៣១ ខែមករា ឆ្នាំ២០១៧។

អគ្គរដ្ឋអាជ្ញា លោក បុប ហ្វឺហ្គូសុន​ (Bob Ferguson) បានលើកឡើងនៅក្នុងសន្និសីទសារព័ត៌មានថា «គ្មាននរណាម្នាក់​អាចអង្គុយ​លើច្បាប់នោះទេ សូម្បីតែប្រធានាធិបតី ហើយសំឡេងដ៏មានឥទ្ធិពល​ក៏មិនមែន​ជាអ្នកគ្រប់គ្រង​បន្ទប់សវនាការ​នោះដែរ តែគឺជា​រដ្ឋធម្មនុញ្ញ»។ ពាក្យបណ្ដឹងរបស់លោក ហ្វីហ្គូសុន គឺជាលើក​ដំបូងបំផុតដែល​មានគោលដៅលើ​ លោក ដូណាល់ ត្រាំ ត្បិតលោកបានចាត់ទុកថា បទបញ្ជា​ប្រធានាធិបតី​របស់លោក ត្រាំ ជុំវិញការ​ហាមឃាត់ជន​អន្តោប្រវេសន៍ គួរតែត្រូវ​បានចាត់ទុកថា​ជាទង្វើផ្ទុយទៅ​នឹងច្បាប់ និងរដ្ឋធម្មនុញ្ញ​សហរដ្ឋអាមេរិក។​

គួររំលឹកថា​កាលពីថ្ងៃសៅរ៍កន្លងទៅ ចៅក្រម​សហព័ន្ធម្នាក់ក្នុង​ទីក្រុងញូយ៉ក បានសម្រេចចិត្ត​រាំងខ្ទប់ បទបញ្ជា​របស់លោក ដូណាល់ ត្រាំ ស្ដីពីការហាមឃាត់​ប្រជាជនមកពី​ប្រទេសចំនួន០៧ មិនឱ្យជាន់ដីអាមេរិក ក្នុងនោះរួមមាន អ៊ីរ៉ាក់ ស៊ីរី អ៊ីរ៉ង់ លីប៊ី សូម៉ាលី ស៊ូដង់ និងយ៉េមែន។ ប្រការបានបង្កឲ្យមានការតវ៉ា និងថ្កោល​ទោសយ៉ាងខ្លាំងពីសំណាក់ក្រុមអ្នកការពារសិទ្ធិស៊ីវិល និងអ្នកប្រឆាំងលោក ដូណាល់ ត្រាំ ស្រាប់៕