(ហ្សាកាតា)៖ ជនជាតិឥណ្ឌូណេស៊ី០៥នាក់ ត្រូវបានចាប់ខ្លួននៅឯអាកាសយានដ្ឋាន​កោះបាលី (Bali) នៅថ្ងៃពុធម្សិលមិញ បន្ទាប់ពី​បានធ្វើដំណើរ​តាមជើង​ហោះហើរមួយ​មកពីតួកគីជាទីដែល​ពួកគេត្រូវ​បានបណ្ដេញ​មកកាន់ឥណ្ឌូណេស៊ីវិញ សម្រាប់ការព្យាយាមចូល​រួមប្រយុទ្ធ​ជាមួយក្រុម ISIS នៅក្នុង​ប្រទេសស៊ីរី។ នេះបើតាមសារ​ព័ត៌មាន​នៅក្នុងស្រុក Tempo ដកស្រង់សម្ដីដោយសារព័ត៌មាន Channel News Asia​ នៅរសៀលថ្ងៃព្រហស្បតិ៍ ទី២៦ ខែមករា ឆ្នាំ២០១៧។​

យោងតាម​សារព័ត៌មាន Tempo ជនជាតិឥណ្ឌូណេស៊ីខាងលើ​មានស្ត្រី០២នាក់ និងបុរស០៣នាក់ត្រូវបាន​អាជ្ញាធរតួកគី​ចាប់ខ្លួននៅក្នុង​ផ្ទះមួយ​កាលពីថ្ងៃទី១៦ ខែមករាកន្លងទៅ ខណៈអ្នកនាំ​ពាក្យ​ប៉ូលិសឥណ្ឌូណេស៊ី​នៃកោះបាលី លោក Hengky Widjaja ក៏បាន​ឱ្យដឹងដែរ​ថា ពួកគេទំាងនេះបានចាកចេញ​ពី​ឥណ្ឌូណេស៊ី កាលពី​ខែសីហា ឆ្នាំ២០១៦ ដោយធ្វើដំណើរកាត់តាមប្រទេសថៃ​ដើម្បីឆ្ពោះបន្ត​ទៅកាន់​ប្រទេស​តួកគី។

លោក Hengky បានបន្ថែមថា «ជនជាតិឥណ្ឌូណេស៊ីទំាង០៥នាក់នេះ មិនបានធ្វើដំណើរតាម​ជើងហោះហើរ​ដោយផ្ទាល់​ទៅកាន់ប្រទេស​តួកគី​នោះទេ ពោលដើម្បីបង្វែរ​ការតាមដានពួកគេ​បានធ្វើដំណើរ​កាត់តាម​ប្រទេសថៃ​ទៅកាន់ទីក្រុងអ៊ីស្ដង់ប៊ូល​តាមជើងហោះហើរ​ នៃក្រុមហ៊ុន​អាកាសចរណ៍ Turkey Airlines​ ដោយមាន​ការរៀបចំ​ និងផ្ដល់ជំនួយ​ពីសំណាក់​ខ្សែបណ្ដាញ​ក្រុម ISIS ​នៅក្នុងតំបន់»

គួររំលឹកថា​កាលពីថ្ងៃសៅរ៍សប្ដាហ៍មុន ប៉ូលិសឥណ្ឌូណេស៊ី ក៏បានចាប់ខ្លួនមនុស្ស១៧នាក់ផងដែរ នៅឯអាកាសយានដ្ឋានក្នុងទីក្រុងហ្សាការតា ក្រោមបទសង្ស័យថាបានព្យាយាមចូលរួមជាមួយក្រុម ISIS។ ក៏ប៉ុន្តែអ្នកទាំងនេះត្រូវបានដោះលែងវិញកាលពីថ្ងៃអង្គារ បន្ទាប់ពីគ្មានភស្ដុតាងដាក់បន្ទុកគ្រប់គ្រាន់៕