(​ញូយ៉ក)៖ អង្គការសហប្រជាជាតិ​បានថ្កោលទោស​អ៊ីស្រាអែល សម្រាប់ការធ្វើ​សកម្មភាព​អាណានិគម តាមរយៈគំរោង​សាងសង់​លំនៅឋានបន្ថែម នៅឯតំបន់​ដែនដីប៉ាឡេស្ទីន West Bank​ ហើយដែល​គំរោងនេះ​ត្រូវបានប្រកាស​ចេញ​តែប៉ុន្មានថ្ងៃប៉ុណ្ណោះ ក្រោយពីមាន​កិច្ចសន្ទនា​តាមទូរស័ព្ទរវាងលោក ដូណាល់ ត្រាំ និង នាយករដ្ឋមន្ត្រី​អ៊ីស្រាអែល លោក ប៊ិនចាមីន ណឺតាន់យ៉ាហ៊ូ ដោយនៅក្នុងកិច្ចសន្ទនា​នោះដែរ លោក ត្រាំ បានបង្ហាញគោល​ជំហរគាំទ្រ​អ៊ីស្រាអែល​យ៉ាងពេញទំហឹង រហូតដល់មានព័​ត៌មានលេចលឺថា​ សេតវិមាន កំពុងពិភាក្សាគ្នា​លើផែនការផ្លាស់ប្ដូរ​ស្ថានទូតអាមេរិក​ពីទីក្រុង Tel Aviv​ ទៅកាន់ទីក្រុង Jerusalem។  នេះបើតាម​ការចេញផ្សាយ​ដោយ​ សារព័ត៌មាន BBC ​នៅរសៀលថ្ងៃពុធ ទី២៥ ខែមករា ឆ្នាំ២០១៧។

លោក ណឺតាន់យ៉ាហ៊ូ កាលពីថ្ងៃអង្គារម្សិលមិញ បាននិយាយដោយ​ឥតលាក់លៀមថា អ៊ីស្រាអែល ចង់សាងសង់​អាគារលំនៅឋាន ២,៥០០ខ្នងបន្ថែមទៀត នៅក្នុងតំបន់​អាណានិគមរបស់ជន​ជាតិជ្វីហ្វ (Jewish) នៅ​តំបន់​ West Bank​ ដើម្បីឆ្លើយតប​ទៅនឹងតម្រូវការ​​លំនៅឋាន។ ក៏ប៉ុន្តែជុំវិញគំរាងនេះដែរ អង្គការសហប្រជាជាតិ​តាមរយៈអ្នកនាំពាក្យ លោក Stephane Dujarric បានលើកឡើងថាសកម្មភាព​ឯកតោភាគី​បែបនេះ គឺជាឧបសគ្គ​រារាំងដល់ការស្វែងរក​សន្តិភាព ឈរលើមូលដ្ឋាន​ដំណោះស្រាយ​រដ្ឋចំនួនពីរ។

លោក Dujarric បញ្ជាក់ដូច្នេះថា «សម្រាប់​អគ្គលេខាធិការ​អង្គការ​សហប្រជាជាតិ (លោក Antonio Guterres) គំរោង​​របស់អ៊ីស្រាអែលមិនមែនជា​ផែនការ B​ ពាក់ព័ន្ធ​ដំណោះស្រាយ​រដ្ឋចំនួនពីរ​នោះឡើយ។ ប៉ុន្តែវាគឺជា​សកម្មភាពឯកតោភាគី ដែលបង្កជា​ការព្រួយបារម្ភ​យ៉ាងខ្លាំង និងគ្រាន់តែជាឧបសគ្គ​រារាំង​ដល់​​ដំណើរការស្វែងរកសន្តិភាព​តែប៉ុណ្ណោះ ត្បិតអ្វីដែលចាំបាច់សម្រាប់ភាគីទាំងពីរត្រូវធើ្វ​នោះគឺការ​ចូលរួមដោយ​ស្មោះត្រង់ ក្នុងកិច្ចចរចា​ដើម្បីឈានដល់វត្ថុ​បំណង​រដ្ឋពីរ គឺប៉ាឡេស្ទីន និងអ៊ីស្រាអែល ឬរដ្ឋពីរសម្រាប់ប្រជាជនទាំងពីរ»។

គួរបញ្ជាក់ថាក្នុងពេលបច្ចុប្បន្ន ប្រជាជនជ្វីហ្វប្រមាណជា ៥០០,០០០នាក់កំពុងរស់​នៅក្នុងអាគារ​លំនៅឋានជាង១៤០អគារ ចាប់តាំងពី​អ៊ីស្រាអែលធ្វើអាណានិគមនៅក្នុងតំបន់ West Bank និងភាគខាងកើត​ទីក្រុង Jerusalem នៅឆ្នាំ១៩៦៧មក៕