(ប៊ែលហ្សិក)៖ អ្នកចូលចិត្តញាំ​អាហារសមុទ្រ​ទាំងអស់​កំពុង​តែស្រូបយក​កម្ទេចជាតិប្លាស្ទិកតូចៗ​ ទៅក្នុង​ឈាម​របស់ពួកគេ ដោយពុំបាន​ដឹង​​ពី​ផលប៉ះពាល់​ចំពោះសុខភាព​ពួកគេនោះ​ឡើយ។ នេះបើតាម​ការចេញ​ផ្សាយ​ដោយ​សារព័ត៌មាន Sky News នៅមុននេះ​បន្តិចនា​ល្ងាច​ថ្ងៃ​អង្គារ ទី២៤ ខែមករា ឆ្នាំ២០១៧។

កម្ទិចប្លាស្ទិក​ខាងលើ​ដែលមានទំហំ​មិនដល់មួយមីលីម៉ែត្រ​ផងនោះ ភាគច្រើន​ត្រូវបានគេ​រកឃើញនៅ​ក្នុងលៀស​ និងគ្រំសមុទ្រ។ នៅក្នុងការ​វាយ​តម្លៃស្ទាបស្ទង់​ហានិភ័យក្រុមអ្នកវិទ្យាសាស្រ្ត​បានធ្វើការ​គណនាថា​កម្ទិចប្លាស្ទិច​ទាំងនោះ​ជាង​៩៩ភាគរយ ឆ្លងកាត់ខ្លួនប្រាណរបស់​មនុស្ស​ ប៉ុន្តែចំនួន​ជិតមួយភាគរយ​ដែលនៅសល់​ត្រូវបានស្រូប​យកដោយ​ជាលិការបស់​សារពាង្គកាយ។

អ្នកស្រាវជ្រាវ​មកពីសាកលវិទ្យា​ល័យ Ghent ក្នុងប្រទេសប៊ែលហ្សិក​ជឿ​ជាក់​ថា​ ​ប្រជា​ជន​នៅតាម​បណ្តា​ប្រទេស​​ក្នុងទ្វីបអឺរ៉ុប​​សព្វ​ថ្ងៃ​កំពុង​​នាំ​យក​សារធាតុប្លាស្ទិច ​រហូតដល់ចំនួន​​១១,០០០បំណែក​ទៅក្នុងខ្លួន តាមរយៈអាហារ​របស់ពួកគេ​ជារៀងរាល់ឆ្នាំ ហើយចំនួន​​កម្ទិច​កម្ទីរ​​ប្លា​ស្ទិច​ទាំង​នោះ​មិនដល់៦០នោះឡើយ​ទំនង​ជា​ជ្រាបចូលក្នុង​​សារពាង្គកាយ។ ម៉្យាងវិញទៀត​បរិមាណ​ប្លាស្ទិច​​​ដែលស្រូប​​ចេញពីអាហារ​របស់យើង​នឹង​កើន​ឡើង​បន្ថែមទៀត ដោយសារតែការបំពុលប្លាស្ទិច​នៅក្នុងផ្ទៃទឹកសមុទ្រ​កាន់​តែ​អាក្រក់​ទៅៗ​។

លោកវេជ្ជបណ្ឌិត Colin Janssen ដែលជា​អ្នកដឹកនាំការ​សិក្សាស្រាវជ្រាវនេះ​បានថ្លែងប្រាប់សារព័ត៌មាន Sky News ថាវត្តមានរបស់សារធាតុ​ប្លាស្ទិក​នៅក្នុងខ្លួនប្រាណ​របស់យើង​គឺជាក្តីបារម្ភមួយ។ លោកបាន​និយាយថា «ឥឡូវនេះយើង​បានដឹងហើយ​ថា​ សារធាតុទាំងនោះ​ពិតជា​ចូល​ទៅក្នុង​សាពាង្គកាយ​របស់ពួកយើង និងអាច​ស្ថិតនៅទីនោះ​បានមួយរយៈពេល ដូច្នេះយើង​ចាំបាច់ត្រូវបន្ត​ការស្រាវជ្រាវឲ្យ​ដឹងពីជោគវាស​នា​​ប្រាកដ​នៃជាតិប្លាស្ទិច​ទាំងនោះ ដោយបច្ចុប្បន្ន​យើងពុំទាន់បាន​ដឹងច្បាស់ពីរឿង​ទាំងអស់នេះ​នៅឡើយ»

គួរបញ្ជាក់ថាកាកសំណល់ប្លាស្ទិចជាង០៨លានតោនត្រូវបានបោះចោល និងហូរចូលក្នុងសមុទ្រក្នុងមួយឆ្នាំៗ ហើយសារ​ធាតុ​នេះ​​ត្រូវ​ការ​​ចំណាយ​ពេល​​វេលា​​រាប់​សត​វត្សរ៍​​ ដើម្បី​រំលាយ​ខ្លួន៕