(បាដាត)៖ មេបញ្ជាការកងទ័ពអ៊ីរ៉ាក់ លោក Abdul Ameer Rasheed Yarallah បានឱ្យដឹង​នៅថ្ងៃអង្គារ​នេះថា កម្លាំងអ៊ីរ៉ាក់បាននិងកំពុងចាប់​ផ្ដើមរៀបចំ​ការវាយលុក​ដណ្ដើម​យកតំបន់​ភាគខាងលិច​ទីក្រុង Mosul បន្ថែមទៀត បន្ទាប់ពីការទទួលបានជោគជ័យជាច្រើនទីតាំងមកហើយ នៅក្នុងបេសកកម្មរំដោះទីក្រុង​ដែលត្រូវបានក្រុម ISIS ប្រើប្រាស់ជា​មូលដ្ឋានស្នូល​ជិតបីឆ្នាំមកហើយនោះ។ នេះបើ​តាមការ​​ចេញផ្សាយ​ដោយ​ទីភ្នាក់ងារ​សារព័ត៌មាន Reuters នៅរសៀលថ្ងៃអង្គារ ទី២៤ ខែមករា ឆ្នាំ២០១៧។​

ការប្រកាសនេះ​ត្រូវបានធ្វើឡើង​តែមួយ​ថ្ងៃប៉ុណ្ណោះ បន្ទាប់ពីកង​កម្លាំងអ៊ីរ៉ាក់​អះអាងកាលពីថ្ងៃចន្ទ​ម្សិលមិញ​ថា​ ពួកគេ​បានវាយ​ដណ្ដើម​យក​តំបន់ភាគខាងជើងទីក្រុង Mosul ពីពួក ISIS​ ក្រោយវាយ​ប្រយុទ្ធគ្នា​ជិត​១០០ថ្ងៃមកនេះ។ ដោយឡែក​បើតាមការបញ្ជាក់ប្រាប់ស្ថានីយ៍​ទូរទស្សន៍ Mosuliya TV លោក Rasheed Yarallah បានថ្លែងថា​ កងកម្លាំងអ៊ីរ៉ាក់​កំពុងរៀបចំប្រតិបត្តិការ​ត្រៀមវាយលុក​នៅរយៈពេលពីរឬបីថ្ងៃ ខាងមុខនេះ ដើម្បីវាយយក​តំបន់ត្រើយខាងកើត​នៃទីក្រុង Mosul ស្ថិតនៅតាមបណ្ដាភាគខាងលិចនៃទន្លេ Tigris ពីក្រុមរដ្ឋអ៊ីស្លាម ISIS​ ត្រឡប់មកវិញ។

គួរបញ្ជាក់ថាក្រុមកងកម្លំាង​ដែលបណ្ដុះបណ្ដាល​ដោយអ៊ីរ៉ង់ ដែលបានបង្កើតឡើងនៅឆ្នាំ២០១៤ ក៏នឹងត្រូវ​ចូលរួមនៅ​ក្នុងប្រតិបត្តិការ​យោធានេះដែរ។ កងម្លាំងទំាងនេះ​បានក្លាយ​ជាផ្នែកមួយ​នៃកងទ័ពអ៊ីរ៉ាក់ជាផ្លូវការ កាលពីឆ្នាំ២០១៦៕