អង់គ្លេស៖ ជើងហោះហើរជាង១០០អាចនឹងត្រូវលុបចោល ដោយសារអ័ព្ទក្រាស់ បង្កឡើងដោយសីតុណ្ហភាពត្រជាក់សូន្យអង្សាសេ
23-01-2017 16:36
(ឡុងដ៏)៖ អ្នកដំណើររាប់ពាន់នាក់អាចនឹងប្រឈមមុខការលុបចោល ឬពន្យាពេលជើងហោះហើររបស់ពួកគេ បន្ទាប់ពីអាកាសយានដ្ឋានជាច្រើននៅភាគខាងត្បូងប្រទេសអង់គ្លេស កំពុងគ្របដណ្ដប់ដោយអ័ព្ទយ៉ាងក្រាស់ខ្មឹក បណ្ដាលមកពីអាកាសធាតុធា្លក់ត្រជាក់ខ្លាំង រហូតដល់សូន្យអង្សាសេ។ នេះបើតាមការចេញផ្សាយដោយសារព័ត៌មាន Sky News នៅរសៀលថ្ងៃចន្ទ ទី២៣ ខែមករា ឆ្នាំ២០១៧។
ជាមួយគ្នានោះដែរអាកាសយានដ្ឋាន Heathrow បានសម្រេចចិត្តលុបចោលជើងហោះហើរជាង១០០ ក្រោមហេតុផលសុវត្ថិភាព រីឯជើងហោះហើរចំនួន១០ទៀតត្រូវបានលុបចោលនៅអាកាសយានដ្ឋានទីក្រុងឡុងដ៏ ខណៈអាកាសយានដ្ឋាន Gatwick ក៏បានលុបចោលជើងហោះហើរមួយផងដែរ។ ជាងនេះទៅទៀត អាកាសយានដ្ឋានជាច្រើនក្នុងនោះរួមមានទាំង Stansted បានប្រាប់ឱ្យអ្នកដំណើរ ពិនិត្យស្ថានភាពជើងហោះហើររបស់ពួកគេ មុននឹងត្រឡប់ទៅផ្ទះវិញ។
គួរបញ្ជាក់ថា អាជ្ញាធរអង់គ្លេស បានប្រកាសសញ្ញាអាសន្នកំរិតពណ៌លឿង ស្ដីពីស្ថានអ័ព្ទនៅក្នុងទីក្រុងឡុងដ៏ ដែលជាកម្រិតបង្គួរមួយ៕
