(សេអ៊ូល)៖ បន្ទាប់ពីប្រធានាធិបតីថ្មីអាមេរិក លោក ដូណាល់ ត្រាំ ស្បថឡើងកាន់តំណែងជាផ្លូវការបានពីរថ្ងៃមកហើយនេះ វាក៏ដល់ពេលដែលកូរ៉េខាងជើងត្រូវធ្វើការប្រារព្ធខួបទី ៤៩ឆ្នាំផងដែរ នៃការរឹបអូសបាននាវាស៊ើបការណ៍សម្ងាត់អាមេរិក Pueblo នៅថ្ងៃចន្ទនេះ ហើយទីក្រុងព្យុងយ៉ាងក៏ចេញសារព្រមានស្របពេលនឹងគ្នាដែរថាខ្លួននឹងធ្វើការវាយបកឲ្យបានខ្លាំងក្លាជាទីបំផុត ប្រសិនបើមានសកម្មភាពឈ្លានពានណាមួយពីអាមេរិកទៀត។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នាព្រឹកថ្ងៃចន្ទ ទី២៣ ខែមករា ឆ្នាំ២០១៧។
នាវាស៊ើបការណ៍របស់អាមេរិក ដែលមានទម្ងន់ ៩០៦តោនត្រូវបានកូរ៉េខាងជើងចាប់បាន កាលពីខែមករា ឆ្នាំ១៩៦៨ ដោយកាលណោះរដ្ឋាភិបាលកូរ៉េខាងជើងបានអះអាងថា នាវាអាមេរិកបានរំលោភចូលដែនទឹករបស់ខ្លួន ខណៈអាមេរិកបានបញ្ជាក់តបវិញថា នៅពេលដែលកូរ៉េខាងជើងធ្វើការវាយប្រហារនាវា Pueblo នោះគឺនាវានេះស្ថិតនៅក្នុងដែនទឹកអន្តរជាតិសុទ្ធសាធ។
គួរបញ្ជាក់ថានៅថ្ងៃដែលនាវាអាមេរិកខាងលើនេះរងការវាយប្រហារនោះ គឺមនុស្សជាង ៨០នាក់នៅលើនោះក៏ត្រូវបានកូរ៉េខាងជើងចាប់ឃាត់ខ្លួនផងដែរ ហើយក្រោយមករយៈពេល ១១ខែទើបទីក្រុងព្យុងយ៉ាងព្រមធ្វើការដោះលែង ដោយសារតែអាមេរិកបានសរសេរលិខិតសូមអភ័យទោសជាផ្លូវការ។ ចាប់តាំងពីពេលនោះមក មានទីក្រុងមួយត្រូវបានដាក់ឈ្មោះ Pueblo នៅក្នុងរដ្ឋខូឡូរ៉ាដូ សហរដ្ឋអាមេរិក។
ជុំវិញរឿងរ៉ាវនេះកូរ៉េខាងជើងនៅតែបន្តការរំលឹកអាមេរិកជារៀងរាល់ថ្ងៃខួប ដើម្បីកុំឲ្យភ្លេចថ្ងៃដែលខ្លួនធ្វើការរឹបអូសនាវា Peublo កាលពីឆ្នាំ១៩៦៨ និងថែមទាំងបានព្រមានទៀតថា «កូរ៉េខាងជើងមានសមត្ថភាពពេញបរិបូរណ៍ ក្នុងការកម្ចាត់ចក្រពត្តិអាមេរិកចេញពីភពផែនដីនេះបាន៕
