(វ៉ាស៊ីនតោន)៖ ក្រុមហ៊ុន Apple បានសម្រេច​ដាក់ពាក្យបណ្តឹង​ទាមទារទឹកប្រាក់​ចំនួន១ពាន់លានដុល្លារ អាមេរិក​ពីក្រុមហ៊ុន​ផ្គត់ផ្គង់ Qualcomm នា​ថ្ងៃ​សៅរ៍​​នេះ នៅប៉ុន្មាន​ថ្ងៃក្រោយ​ពេលដែល​រដ្ឋាភិបាល​អាមេរិក​ បានចោទ​ប្រកាន់​ក្រុមហ៊ុនផលិតបន្ទះឈីប​ទូរស័ព្ទ​ដៃ​មួយនេះ​ថា បានងាក​​ទៅ​ប្រើ​ប្រាស់​យុទ្ធសាស្រ្ត​ ដែលសំដៅ​កាត់បន្ថយ​ និងរារាំង​លទ្ធភាព​ប្រកួតប្រជែង​នៅក្នុង​ទីផ្សារសេរី។ នេះបើ​តាមការចេញ​ផ្សាយ​ដោយ​ ទីភ្នាក់ងារ​ព័ត៌មាន Reuters នៅមុននេះ​បន្តិចនា​រសៀល​​ថ្ងៃសៅរ៍ ទី២១ ខែមករា ឆ្នាំ២០១៧។

ក្រុមហ៊ុន Qualcomm គឺជាអ្នកផ្គត់ផ្គង់ដ៏សំខាន់មួយរបស់ក្រុមហ៊ុន Apple និង Samsung Electronics សម្រាប់បន្ទះឈីបទំនើបៗដែលធ្វើ​ការ​តភ្ជាប់​ស្មាតហ្វូនទៅកាន់បណ្តាញ Wi-Fi ហើយ​ក្រុមហ៊ុន​ទាំងពីរនេះ​ គឺជាអ្នកចូលរួមចំណែកដ៏ធំមួយ​ នៃប្រាក់​ចំណូល​ចំនួ​ន​២៣.៥ពាន់​លានដុល្លារ​ស្នើនឹង ៤០ភាគរយរបស់ Qualcomm នាពេលថ្មីៗនេះ។

ដោយឡែក​នៅ​ក្នុង​​ពាក្យបណ្តឹង​ដែលត្រូវ​បានដាក់​ទៅកាន់តុលារ​ នៅរដ្ឋកាលីហ្វរញ៉ាសហរដ្ឋអាមេរិក ក្រុមហ៊ុន Apple បាន​ចោទ​​ប្រកាន់​​ក្រុមហ៊ុន Qualcomm ថាបាន​ទាមទារ​តម្លៃហួសប្រមាណ​ចំពោះ​បន្ទះឈីប ហើយបាន​បដិសេធ​មិនបង់លុយ​ប្រមាណ ១ពាន់ដុល្លារ​នៅក្នុង​ន័យជា​ប្រាក់​បង្វិល​ដែល​បានសន្យា​នោះ​ឡើយ។

គួរបញ្ជាក់​ដែរថា Qualcomm គឺជាក្រុមហ៊ុន​តែ​មួយគត់​ដែលជាអ្នកផ្គត់ផ្គង់​បន្ទះឈីប​ជំនាន់ថ្មី​ សម្រាប់​ស្មាតហ្វូន​របស់​ក្រុមហ៊ុន Apple រហូត​ដល់​ពេល​ចេញ iPhone 7 និង 7 Plus កាលពី​ខែកញ្ញា​កន្លងទៅនេះ ដោយ​ក្រុមហ៊ុន Intel បានចាប់​ផ្តើមធ្វើ​ការផ្គត់ផ្គត់​បន្ទះឈីប​ជំនាន់ថ្មី​ក្នុងចំនួន​ប្រហែល​ជាពាក់កណ្តាល​សម្រាប់​ស្មាតហ្វូន​ស៊េរីថ្មី​នេះ៕