(សេអ៊ូល)៖ ទោះបីកូរ៉េខាងជើងបានធ្វើការព្រមានជាច្រើនដង អំពីការបាញ់សាកល្បងមីស៊ីលផ្លោងអន្តរទ្វីប ICBM ដែលជាសញ្ញាមួយដែលក្រុមអ្នកជំនាញកូរ៉េខាងត្បូងមួយចំនួន បានមើលឃើញថាទីក្រុងព្យុងយ៉ាងអាចនឹងបាញ់សាកល្បងមីស៊ីលប្រភេទនេះ នៅអំឡុងថ្ងៃ លោក ដូណាល់ ត្រាំ ស្បថចូលកាន់តំណែងជាប្រធានាធិបតីអាមេរិកទី៤៥ ជាផ្លូវការនៅថ្ងៃសុក្រ (ម៉ោងនៅក្នុងរដ្ឋធានីវ៉ាស៊ីនតោន) យ៉ាងណាក្តីក៏មកទល់ពេលនេះ គេពុំឃើញមានការបាញ់មីស៊ីល ឬសកម្មភាពមិនប្រក្រតីណាមួយរបស់កូរ៉េខាងជើងនោះឡើយ។ នេះបើតាមការចេញផ្សាយដោយទីភ្នាក់ងារសារព័ត៌មានយ៉ុនហាប់ នៅព្រឹកថ្ងៃសៅរ៍ ទី២១ ខែមករា ឆ្នាំ២០១៧។
ដោយឡែកកាលពីថ្ងៃទី០៨ ខែមករា កន្លងទៅសារព័ត៌មានរដ្ឋកូរ៉េខាងជើង បានបញ្ជាក់បែបព្រមានថា កូរ៉េខាងជើងនឹងបាញ់សាកល្បងមីស៊ីល ICBM គ្រប់ពេលវេលាគ្រប់ទីកន្លែងឱ្យតែ លោក គីម ជុងអ៊ុន ដាក់បញ្ជាខណៈយោធាកូរ៉េខាងត្បូងក៏បានឱ្យដឹងនៅថ្ងៃព្រហស្បតិ៍សប្តាហ៍នេះផងដែរថាកូរ៉េខាងជើង អាចនឹងបាញ់សាកល្បងមីស៊ីល ICBM នៅពេលដ៏ខ្លីខាងមុខនេះ។
ទន្ទឹមនឹងនេះនៅក្នុងសេចក្ដីថ្លែងការណ៍មួយ សារព័ត៌មានរដ្ឋកូរ៉េខាងជើង Rodong Sinmun បាននិយាយចំៗឱ្យសហរដ្ឋអាមេរិកថា «ការបាញ់សាកល្បងមីស៊ីលផ្លោង ICBM គឺជាការបង្កើនសមត្ថភាពការពារខ្លួនដ៏ត្រឹមត្រូវពីការគំរាមកំហែងធ្វើសង្រ្គាមនុយក្លេអ៊ែរ ពីសំណាក់សហរដ្ឋអាមេរិកប្រឆាំងនឹងទីក្រុងព្យុងយ៉ាង ហើយទីក្រុងវ៉ាស៊ីនតោន ក៏គ្មានសិទ្ធិអ្វីមកនិយាយពីការបាញ់សាកល្បងនេះដែរ ពីព្រោះវាកើតឡើងក៏ដោយសារតែនយោបាយឈ្លានពានរបស់សហរដ្ឋអាមេរិក ប្រឆាំងនឹងកូរ៉េខាងជើង»។
«យើងមិនខ្វល់ឡើយថាអ្នកដទៃនិយាយឬគិតយ៉ាងមេច ប៉ុន្តែការបាញ់សាកល្បងមីស៊ីលផ្លោង ICBM របស់យើងនឹងត្រូវធ្វើឡើងតាមពេលវេលា និងទីកន្លែងជាក់លាក់ឱ្យតែមេដឹកនាំរបស់យើងសម្រេចចិត្ត ឬដាក់បញ្ជា»។ នេះបើតាមសារព័ត៌មានរដ្ឋកូរ៉េខាងជើង Rodong Sinmun។
គួររំលឹកថានៅទីបំផុតមហាសេដ្ឋីប្រចាំទីក្រុងញូយ៉កលោក ដូណាល់ ត្រាំ បានស្បថឡើងកាន់តំណែងជាប្រធានាធិបតីទី៤៥របស់សហរដ្ឋអាមេរិក បន្តលោក បារ៉ាក់ អូបាម៉ា ហើយ ដែលពិធីទាំងមូលរៀបចំឡើងនៅក្នុងវិមាន Capital ក្នុងរដ្ឋធានីវ៉ាស៊ីនតោន ជាក្បាលម៉ាស៊ីនដឹកនាំសហរដ្ឋអាមេរិកទាំងមូល នៅវេលាថ្ងៃត្រង់ទី២០ ខែមករា ឆ្នាំ២០១៧ ត្រូវនឹងពេលវេលារំលងអធ្រាតឈានចូលថ្ងៃសៅរ៍ ទី២១ ខែមករា ឆ្នាំ២០១៧ ម៉ោងនៅកម្ពុជា និងបានប្រព្រឹត្តទៅយ៉ាងរលូនជាទីបំផុត៕
