(វ៉ាស៊ីនតោន)៖ នៅអំឡុងថ្ងៃស្បថឡើងកាន់តំណែង នៅពេញមួយថ្ងៃទី២០ ខែមករា ឆ្នាំ២០១៧នោះ មានការតវ៉ាប្រឆាំងយ៉ាងខ្លាំងក្លាពី សំណាក់ក្រុមបាតុករមកពី​គ្រប់ទិសទី ក៏បានកើតឡើងស្របពេលនៃ​ពិធី​ដ៏ធំជាប្រវត្តិសាស្ត្ររបស់មហាអំណាចលេខ១ ពិភពលោកមួយនេះ ដោយសារតែ​ក្រុមអ្នកគាំទ្រ​លោកស្រី ហ៊ីលឡារី គ្លីនតុន ដែលបានចាញ់ឆ្នោត នៅតែកើតទុក្ខមិនសុខចិត្ត​ចំពោះប្រធានាធិបតីជាប់ឆ្នោត ដែលបានស្បថឡើងកាន់តំណែងជាផ្លូវការទៅហើយ គឺលោក ដូណាល់ ត្រាំ។ នេះបើតាមខ្សែវីដេអូ ដែលចេញផ្សាយនៅក្នុងបណ្តាញសារព័ត៌មាន Sky News នៅព្រឹកថ្ងៃសៅរ៍ ទី២១ ខែមករា ឆ្នាំ២០១៧។

បាតុកម្មពីដំបូងឡើយត្រូវបានគ្រោងរៀបចំឡើងដោយសន្តិវិធី ដោយមានការសរសេរបដាប្រឆាំង និងការដើរដង្ហែរក្បួនដើម្បីស្រែកមិនគាំទ្រ ចំពោះពិធីស្បថឡើងកាន់តំណែងប៉ុណ្ណោះ ប៉ុន្តែវា​បានឈាន​ទៅដល់ភាព​ក្តៅគគុក​​ តាមរយៈការដុតឧបករណ៍ និងសម្ភារៈនានាដែលបង្កជាភ្នក់ភ្លើង និងផ្សែង​ខ្មួលខ្មាញ់​យ៉ាងអណាធិបតេយ្យ​​​នៅក្នុងរដ្ឋធានីវ៉ាស៊ីនតោន ដែលជាបេះដូងនៃសហរដ្ឋអាមេរិកទាំងមូល និងជាទីកន្លែងដែល​លោក ដូណាល់ ត្រាំ ធ្វើពិធីស្បថឡើងកាន់តំណែងជាប្រធានាធិបតីទី៤៥ របស់អាមេរិក។

ប្រភពព័ត៌មានបានឲ្យដឹងថា នៅថ្ងៃឡើងស្បថឡើងកាន់តំណែងរបស់លោក ត្រាំ បាតុករសរុប​ជាង ២០០នាក់ត្រូវបានចាប់ខ្លួននៅទីក្រុងវ៉ាស៊ីនតោន ដោយសារតែពួកគេបានផ្ទុះការតវ៉ាខ្លាំងក្លា ឈានដល់ការ​បំផ្លាញសណ្តាប់ធ្នាប់សង្គម និងតដៃជាមួយសមត្ថកិច្ចថែមទៀត។ ដោយឡែក​ការតវ៉ានៅទីក្រុង​ឡូសអាន់ជែឡេស នៃរដ្ឋកាលីហ្វរញ៉ាវិញ គឺមិនបានបង្កជាបញ្ហាអ្វីធំដុំនោះឡើយ៕