(អូស្ត្រាលី)៖ អ្នកបើកបររថយន្តបង្កហេតុ ត្រូវបានសមត្ថកិច្ចអូស្ត្រាលីចាប់ខ្លួននៅហ្នឹងកន្លែង​កើតហេតុ​ស្ថិតនៅមុខផ្សារ​មួយកន្លែង​នៅកែងដងវិថី Bourke និង Gueens ក្នុងទីក្រុងមែលប៊ន កាលពី​វេលាម៉ោង ២៖០០នាទីរសៀលម៉ោងនៅទីក្រុងស៊ីដនី ក្រោយពីរូបគេបានបង្កគ្រោះថ្នាក់ចរាចរណ៍ដ៏គួរឲ្យ​តក់ស្លុតមួយ គឺការបុករះក្រុមអ្នកដំណើរតាមចិញ្ចើមផ្លូវ ដោយសារតែរថយន្តបាត់បង់ភាពម្ចាស់ការ។ នេះបើ​តាមការ​ផ្សាយ​របស់សារព័ត៌មាន The Guardian នៅមុននេះបន្តិច​នាព្រឹកថ្ងៃសុក្រ ទី២០ ខែមករា ឆ្នាំ២០១៧។

ប៉ូលិសប្រចាំរដ្ឋវិតូរៀ បានលើកឡើងយ៉ាងដូច្នេះថា «អ្នកបើកបរទំនងជាបុរសម្នាក់ ដែលបានបើករថយន្ត ទាំងកម្រោលមកបុករះក្រុមមនុស្សម្នា ដែលដើរ នៅតាមចិញ្ចើមផ្លូវ។ ពីដំបូងក្នុងចំណោមមនុស្សរងរបួស​ទាំងជាង ២០នាក់នោះមិនមានអ្នកស្លាប់ឡើយ ប៉ុន្តែក្រោយមកបន្តិចទើបសមត្ថកិច្ចអះអាងថា អ្នកទទួលរងរបួសធ្ងន់ម្នាក់បានស្លាប់ នៅហ្នឹងកន្លែងបាត់ទៅហើយ»។

ជុំវិញបញ្ហានេះប៉ូលិសអូស្ត្រាលី មិនបានបង្ហាញអត្តសញ្ញាណរបស់អ្នកបើកបររថយន្តបង្កហេតុខាងលើ​នេះឡើយ ដោយត្រូវរង់ចាំការស៊ើបអង្កេតជាបន្តទៀត៕