(ម៉ូស្គូ)៖ ក្រសួងការបរទេសរុស្ស៊ីបានលើកឡើងថា រដ្ឋាភិបាលអាមេរិកក្រោមការដឹកនាំរបស់លោកប្រធានាធិបតី​ជិតផុតអាណត្តិ​ បារ៉ាក់ អូបាម៉ា បានបង្កឲ្យទំនាក់ទំនងរវាងទីក្រុងវ៉ាស៊ីនតោន និងទីក្រុងម៉ូស្គូ ធ្លាក់ចុះដុនដាបជាខ្លាំងរហូតដល់កំរិតមួយដែលស្ទើរតែដូចទៅនឹងស្ថាន​ការណ៍កាលពីសម័យសង្រ្គាមត្រជាក់។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅយប់ថ្ងៃព្រហស្បតិ៍ ទី១៩ ខែមករា ឆ្នាំ២០១៧។

ថ្លែងក្នុងសន្និសីទសារព័ត៌មានប្រចាំសប្តាហ៍លោកស្រី Maria Zakharova ​អ្នកនាំពាក្យក្រសួងការបរទេសរុស្ស៊ី​ បាន​ធ្វើ​ការ​អធិប្បាយ​ទៅ​លើ​លទ្ធផល​នៃ​ការ​ដឹក​នាំ​រយៈ​ពេល​​០៨ឆ្នាំ​របស់លោក បារ៉ាក់ អូបាម៉ា យ៉ាងដូច្នេះថា «លទ្ធផលគឺអាក្រក់មែនទែន! រដ្ឋាភិ​បាល​បក្ស​ប្រជា​ធិប​តេយ្យ​ដែល​ជិត​ផុត​អាណត្តិបានធ្វើឲ្យ​ចំណងទ្វេភាគីរបស់យើង ឲ្យធ្លាក់ដល់កំរិតដូចសម័យសង្រ្គាមដោយចេតនាសុទ្ធសាធ ហើយ​ពួក​គេ​នៅ​តែ​បន្ត​បំផ្លិច​បំផ្លាញមូលដ្ឋានគ្រឹះនៃ​​ចំណងនេះរហូតដល់ថ្ងៃចុងក្រោយ, រហូតដល់នាទីចុងក្រោយ» ហើយលោកស្រី Zakharova បានបន្ថែមទៀតថា សម័យកាលដឹកនាំរបស់​លោក អូបាម៉ា បានក្លាយជាពេលវេលានៃការបាត់បង់ឱកាសសម្រាប់ទំនាក់ទំនងអាមេរិក-រុស្ស៊ី។

នៅក្នុងឱកាសនោះដែរលោកស្រីអ្នកនាំពាក្យបានអះអាងថា ទីក្រុងម៉ូស្គូមានក្តីសង្ឃឹមថា រដ្ឋាភិបាលរបស់លោក ដូណាល់ ត្រាំ នឹង​សំដៅ​បង្កើត​កិច្ច​សន្ទនា​ជាធម្មតាមួយជាមួយប្រទេសរុស្ស៊ី ខណៈពេលដែលភាគីរុស្ស៊ីបានត្រៀមលក្ខណៈរួចជាស្រេច។

គួរបញ្ជាក់ថា កាលពីសប្តាហ៍​មុនសហរដ្ឋអាមេរិក​ បានបញ្ជូនកងទ័ព​ប្រហែល៤,០០០នាក់​រួមជា​មួយ​រថពាស​ដែក​រាប់រយគ្រឿង និងរថក្រោះ​ជាង​៨០គ្រឿង​ទៀតទៅកាន់​ប្រទេស​អាល្លឺម៉ង់ ដើម្បីដឹកជញ្ជូន​ទៅកាន់ប៉ូឡូញ​ និងដាក់​ពង្រាយ​​នៅបន្តតាម​តំបន់អឺរ៉ុប​ខាងកើត ក្នុងនាម​ជាផ្នែក​នៃ​ប្រតិបត្តិការ Atlantic Resolve ដែល​ត្រូវបាន​បង្កើត​ឡើង​ដើម្បី​សំដៅ​ធានាប្រាប់សម្ព័ន្ធ​មិត្ត​របស់​ទីក្រុងវ៉ាស៊ីនតោននៅអឺរ៉ុបថា សហរដ្ឋអាមេរិក​មានការប្តេជ្ញា​យ៉ាងមុះមុត​ដើម្បី​ការពារ​ពួកគេ​ពីទីក្រុង​ម៉ូស្គូ ទោះបីជា​រុស្ស៉ី​បាន​បដិសេធជា​ដដែលៗ​ថា​ ខ្លួនមិន​បង្កការ​គំរាម​កំហែង​ណាមួយ​ដល់អ្នកជិត​ខាង​ ឬ​ក៏ប្រជាជាតិ​ណាមួយ​នៅលើ​ពិភពលោក​នោះ​ឡើយ។

រីឯកាលពីសប្តាហ៍នេះវិញកងម៉ារីន​របស់សហរដ្ឋអាមេរិក​ប្រមាណ​ ៣០០នាក់​បានធ្វើដំណើរ​ទៅដល់​ប្រទេសន័រវេស​ និងបន្តរក្សាវត្តមាន​នៅ​ទី​នោះក្នុង​រយៈពេល​រហូតដល់​០៦ខែ ខណៈដែលការចល័តបែបនេះ​​គឺជាលើកទីមួយហើយចាប់​តាំង​​ពី​សង្រ្គាម​លោក​​លើក​ទី​ពីរ​មក ដែលកង​កម្លាំង​យោធា​​បរទេស​​ត្រូវ​បាន​អនុញ្ញាត​​ឲ្យឈរជើង​​នៅក្នុងប្រទេស​​អឺរ៉ុបខាងជើងមួយនេះ ហើយវាក៏អាចជា​ការរុក​គួន ប្រទេស​រុស្ស៊ី​ដែល​ជា​អ្នក​ជិត​ខាង​​របស់​​ន័រវេសផងដែរ៕