(​វ៉ាស៊ីនតោន)៖ ប្រធានាធិបតី​​សល់តែមួយថ្ងៃទៀតផុតអាណត្តិរបស់អាមេរិក លោកបារ៉ាក់ អូបាម៉ា បាន​និយាយថា ការបន្ធូរបន្ថយ​ទោស​ដល់អតីត​កងទ័ព​អាមេរិកឈ្មោះ Chelsea Manning ដែលកំពុង​ជាប់​ពន្ធនាគារ​ពីបទ​ផ្ដល់ឯកសារ​សម្ងាត់រដ្ឋ​ទៅឱ្យ​គេហទំព័រ Wikileaks​ គឺជារឿង​យុត្តិធម៌ ប៉ុន្តែមិនមែនមាន​ន័យថា​វាជាការលើក​ទឹកចិត្ត​ដល់សកម្មភាព​ចូលលួច​ ឬទម្លាយ​ព័ត៌មាន​សម្ងាត់​របស់​រដ្ឋាភិបាល​អាមេរិក​នោះឡើយ។ នេះបើ​តាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters នៅរសៀលថ្ងៃព្រហស្បតិ៍ ទី១៩ ខែមករា ឆ្នាំ២០១៧ ។

ថ្លែងនៅក្នុង​សន្និសីទសារព័ត៌មាន​ជាលើកចុង​ក្រោយ​ ក្នុងនាមជាប្រធានាធិបតី​អាមេរិក នៅល្ងាច​ថ្ងៃពុធ លោក អូបាម៉ា បាននិយាយថា ការបន្ធូរបន្ថយទោសឱ្យ Manning ពីទោស​ជាប់ពន្ធនាគារ​ ៣៥ឆ្នាំមកនៅត្រឹម ០៧ឆ្នាំ គឺជារឿងយុត្តិធម៌ ពីព្រោះរូបគេ​ត្រូវបាន​កាត់ទៅ​ដោយ​តុលាការ និងហ៊ាន​ទទួលខុស​ត្រូវចំពោះ​បទឧក្រិដ្ឋ​ដែលខ្លួន​បានប្រពឹ្រត្ត។

លោក អូបាម៉ា លើកឡើងដូច្នេះថា «ខ្ញុំមិនមានបញ្ហានោះទេ​ក្នុងការនិយាយថា យុត្តិធម៌​ត្រូវបាន​ប្រគល់​ត្រឡប់​មកវិញ ត្បិតការ​បន្ធូរបន្ថយ​ទោស​ឱ្យ Manning គឺរឿង​ត្រឹមត្រូវពីព្រោះ​នាង (ឬលោក) ត្រូវ​បាន​តុលាការកាត់​ទោស (...) ហើយថែម​ទាំងព្រម​ទទួលស្គាល់​ទោសឧក្រិដ្ឋ ដែល​ខ្លួនបាន​ប្រព្រឹត្ត​ទៀតផង ខណៈទោស​ដែល​នាងបាន​ទទួល​មិនមានភាព​សមាមាត្រ បើធៀប​ទៅនឹង​អ្នកទម្លាយ​ឯកសារសម្ងាត់​របស់រដ្ឋ​ផ្សេងទៀត ​ក៏ប៉ុន្តែ​ខ្ញុំបញ្ជាក់​ឡើងវិញ​ថា Manning ត្រូវបាន​បន្ធូរបន្ថយ​ទោស មិនមែន​លុបចោល​ទោស​ទាំងស្រុង​នោះទេ»។

គួរបញ្ជាក់ថា​កាលពី​ថ្ងៃអង្គារ​កន្លងទៅ លោក បារ៉ាក់ អូបាម៉ា បាន​សម្រេច​ចិត្តបន្ធូរបន្ថយ​ទោស​ដល់អតីតកង​ទ័ព​អាមេរិក​ម្នាក់​ឈ្មោះ Chelsea Manning ពីទោស​ជាប់​ពន្ធនាគារ ៣៥ឆ្នាំមកនៅ​ត្រឹម ០៧ឆ្នាំ ហើយ​ដែលអាច​នឹង​ត្រូវដោះលែង​ឱ្យមាន​សេរីភាព នៅថ្ងៃទី១៧ ខែឧសភា ខាងមុខនេះ។ Chelsea Manning មានឈ្មោះដើម Bradley Manning ត្រូវបាន​តុលាការ​អាមេរិក​ផ្ដន្ទាទោស​កាលពី​ខែសីហា ឆ្នាំ២០១៣ ឱ្យជាប់​ពន្ធនាគារ ៣៥ឆ្នាំពីបទ​បញ្ជូន​ឯកសារ​សម្ងាត់ជាង ៧០០,០០០ទំរង់​ឱ្យទៅ​គេហទំព័រ Wikileaks ក្នុងនោះ​មានទាំង​ឯកសារ​និយាយពី ការ​រំលោភបំពានរបស់កងទ័ពអាមេរិក នៅក្នុងប្រទេស​អាហ្វហ្គានីស្ថាន និង អ៊ីរ៉ាក់ជាដើម៕