(ម៉ូស្គ)៖ មេបញ្ជាការយោធារុស្ស៊ីបានឱ្យដឹងថា កងកម្លំាងទ័ពអាកាសរុស្ស៊ី និងតួកគី បានដឹកនាំប្រតិបត្តិការវាយប្រហារតាមផ្លូវអាកាសរួមគ្នា ដោយបានកម្ទេចគោលដៅប្រមាណជា៣៦ នៃ​ទីតាំងរបស់ក្រុម ISIS ក្នុងខេត្ត Aleppo​ ប្រទេសស៊ីរី​​។ នេះបើតាមការចេញផ្សាយ ដោយសារព័ត៌មាន Sputnik នៅថ្ងៃពុធ ទី១៨ ខែមករា ឆ្នាំ២០១៧។

ពាក់ព័ន្ធនឹងការវាយប្រហារតាមផ្លូវអាកាសនេះដែរ ឧត្ដមសេនីយ៍រុស្ស៊ី លោក Sergei Rudskoy បានបញ្ជាក់ថា៖ «យន្ដហោះចម្បាំង៩គ្រឿងមកពីកងកម្លំាងទ័ព អាកាសរុស្ស៊ី ក្នុងនោះរួមមានទាំងយន្ដហោះ ចម្បាំងធុន Su-24M​ ចំនួន៤គ្រឿង Su-25 ៤គ្រឿង និងយន្ដហោះទម្លាក់គ្រាប់បែក Su-34 ព្រមទំាងយន្ដហោះចម្បាំង នៃកងកម្លំាងទ័ព​អាកាស​តួកគី ដែលមានដូចជា ប្រភេទយន្ដហោះចម្បាំង ធុន F-16 ៤គ្រឿង និង F-4​ ៤គ្រឿង បានចូលរួមនៅក្នុងប្រតិបតិ្តការយោធាវាយប្រហារតាម ផ្លូវអាកាសរួមគ្នាប្រឆាំង​នឹងក្រុម ISIS​ ​ដោយមានការយល់ព្រមពីអាជ្ញាធរស៊ីរីផងដែរ»។

គួរបញ្ជាក់ថា នេះគឺជាលើកទីមួយដែលរុស្ស៊ី និងតួកគី ដឹកនាំប្រតិបត្តិការយោធារួមគ្នាប្រឆាំងនឹងក្រុមភេរវករ តាមរយៈការសម្របសម្រួលពីរដ្ឋាភិបាលស៊ីរី ហើយការ វាយប្រហារនេះទៀតសោតធ្វើឡើងនៅតំបន់ជាយក្រុង al-Bab នៃខេត្ត Aleppo​៕