(អ៊ីស្ដង់ប៊ូល)៖ ប្រព័ន្ធផ្សព្វ​ផ្សាយ​តួកគី​បានរាយការណ៍​ថា ជនសង្ស័យ​ដ៏សំខាន់​ពាក់ព័ន្ធនឹង​ការបាញ់ប្រហារ​សម្លាប់​មនុស្ស​ ៣៩នាក់ នៅក្លឹបរាត្រី​មួយ​កន្លែងក្នុង​ទីក្រុងអ៊ីស្ដង់ប៊ូល កាលពី​ថ្ងៃឆ្លងឆ្នាំសកល​កន្លងទៅ ត្រូវបានអាជ្ញាធរ​តួកគីចាប់​ខ្លួនហើយ។ ​នេះបើតាម​ការចេញ​ផ្សាយ​ដោយ​សារព័ត៌មាន​រុស្ស៊ី Sputnik​ នៅព្រឹកថ្ងៃអង្គារ ទី១៧ ខែមករា ឆ្នាំ២០១៧។

យោងតាម​ស្ថានីយ៍​ទូរទស្សន៍​តួកគី NTV​ កងកម្លាំង​រក្សាសណ្ដាប់​ធ្នាប់​តួកគី បានឃាត់​ខ្លួនជនសង្ស័យ​ម្នាក់​ឈ្មោះ Abdoulgadhir Macharipov​ មាន​ដើមកំណើត​ពីប្រទេស​អ៊ូបេគីស្ថាន ដែលត្រូវ​បានគេ​ចោទ​ប្រកាន់​ថាជាមេក្លោង​ដឹកនាំ​ការវាយប្រហារ​ភេរវកម្មបាញ់​ប្រហារ​នៅឯ​ក្លឹបរាត្រី Reina ក្នុង​ទីក្រុង​អ៊ីស្ដង់ប៊ូល កាលពី​ថ្ងៃឆ្លងឆ្នាំ​សកល​កន្លងទៅ។ ​ប្រភព​ដដែល​បានបញ្ជាក់​ទៀតថា Abdoulgadhir ត្រូវបាន​ចាប់ខ្លួន​​នៅក្នុង​ប្រតិបតិ្តការ​មួយនៅ​ថ្ងៃចន្ទ​ម្សិលមិញ នៅក្នុងសង្កាត់ Esenyurt នៃទីក្រុង​អ៊ីស្ដង់ប៊ូល ជាទីដែល​រូបគេកំពុង​ស្នាក់ក្នុង​ផ្ទះរបស់​អ្នករួមគំនិត​ម្នាក់ទៀត ជាជនជាតិ​កៀហ្ស៊ីស៊ីស្ថាន បន្ទាប់ពី​ត្រឡប់​មកកាន់​​ទីក្រុងអ៊ីស្ដង់ប៊ូល​វិញកាលពី​បីថ្ងៃមុន។

គួរបញ្ជាក់ថា​គិតមកទល់ពេលនេះ អាជ្ញាធរតួកគី​បានចាប់ខ្លួន​មនុស្សសរុប ០៥នាក់ហើយ ក្នុងនោះ​រួមមាន​ទាំងជនសង្ស័យ​ឈ្មោះ Abdoulgadhir និងមិត្តភក្តិម្នាក់​របស់គេ​ជាជនជាតិ​កៀហ្ស៊ីស៊ីស្ថាន និងស្រ្តីបី​នាក់ក្នុងក្របខ័ណ្ឌ​នៃការស៊ើបអង្កេត​ជុំវិញការបាញ់​ប្រហារ​សម្លាប់​មនុស្ស ៣៩នាក់ និង ៦៩នាក់រងរបួស​នៅឯក្លឹបរាត្រី Reina ក្នុងទីក្រុង​អ៊ីស្ដង់ប៊ូលកាលពីថ្ងៃឆ្លងឆ្នាំសកល៕