(វ៉ាស៊ីនតោន)៖ នៅចំពោះមុខ​នៃសញ្ញា​ដ៏ចម្រូងចម្រាស​ នៃគោលនយោបាយ​ពាក់ព័ន្ធនឹង​ប្រទេសចិន អនាគត​រដ្ឋាភិបាល​​អាមេរិក​ថ្មី​ក្រោម​ការ​ដឹកនាំ​​របស់​លោក ដូណាល់ ត្រាំ ទំនងជា​​កំពុងរៀបចំ​​គំរោង​ដើម្បី​បង្កើន​កម្លាំង​យោធា​ជើង​ទឹក​ទ្រង់​ទ្រាយធំ​​នៅ​តំបន់​​អាស៊ី​​ខាង​កើត ​ក្នុងគោល​បំណង​ត្រៀម​ទប់ទល់​នឹង​ឥទ្ធិពល​របស់​ទីក្រុងប៉េកាំង ដែលកំពុង​កើនឡើង​យ៉ាង​ខ្លាំងក្លា។ នេះ​បើ​តាម​ការ​​ចេញ​​ផ្សាយ​​ដោយ​​​សារ​​ព័ត៌​​មាន​ Channel News Asia នៅមុននេះ​បន្តិច​​នាព្រឹក​ថ្ងៃសៅរ៍ ទី១៤ ខែមករា ឆ្នាំ២០១៧។

ប្រភពព័ត៌មាន​ដដែល​បានឲ្យ​ដឹងទៀតថា​ គំរោង​នៃការពង្រី​ក​វិសាលភាព​នៅតំបន់​អាស៊ីខាងកើត​នេះ​រួមមាន ការដាក់ឲ្យ​ឈរជើង​នូវនាវា​ផ្ទុក​យន្ត​ហោះ​ចម្បាំង​មួយគ្រឿង​ទៀត​នៅក្នុង​តំបន់​នោះ និងការ​ដាក់​ពង្រាយ​នាវា​ពិឃាត, នាវាមុជទឹក, និងប្រព័ន្ធ​ការពារ​មីស៊ីល​ជាច្រើន​គ្រឿង​​បន្ថែម​ ព្រមទាំង​ការពង្រីក ឬ​ក៏បង្កើត​បន្ថែម​នូវ​មូលដ្ឋាន​យោធាជើងទឹក​នៅប្រទេសជប៉ុន និងអូស្រ្តាលី។

គួរបញ្ជាក់ថា​ប្រធានាធិបតី​ជាប់ឆ្នោត ​លោក ដូណាល់ ត្រាំ ដែលនឹង​ស្បថចូលកាន់​តំណែង​បន្តពី​លោក បារ៉ាក់ អូបាម៉ា នៅថ្ងៃទី២០ ខែមករា​​ឆាប់ៗ​ខាងមុខនេះ ធ្លាប់បាន​ប្តេជ្ញាថា​នឹង​បង្កើន​ចំនួន​នាវាចម្បាំង​របស់​អាមេរិក​រហូត​ដល់ ៣៥០គ្រឿង ក៏ប៉ុន្តែ​ក្រុមចាត់​ចែង​កិច្ចការ​ផ្ទេរ​អំណាច​របស់​លោក​មិន​បានបញ្ជាក់​ច្បាស់​អំពី​វិធីសាស្រ្ត​នៃការ​ផ្គត់ផ្គង់​ថវិកា​ទៅលើ​ផែនការ​នេះ​ឡើយ នៅចំពោះ​មុខគំរោង​នៃការ​ចំណាយ​ក្នុងចំនួន​​ដ៏ច្រើនដទៃៗ​ទៀត ដែលគេដឹងលោក ត្រាំ បានមានទំនោរ​ប្រឆាំងចិន​តាំងពីអំឡុង ការឃោសនារកសំឡេង​ឆ្នោត និងក្រោយការ​ទទួលបាន​ជោគជ័យ​មកម្ល៉េះ៕