(ប៉េកាំង)៖ ទីភ្នាក់ងារសារព័ត៌មានចិនស៊ិនហួរនៅថ្ងៃសុក្រនេះបានរាយការណ៍ថា ចិននិងរុស្ស៊ីបានឈានដល់ការព្រមព្រៀងគ្នាមួយក្នុងការចាត់វិធានការទប់ស្កាត់ និងឆ្លើយតបទៅនឹងគំរោងដាក់ពងា្រយប្រព័ន្ធខែលការពារមីស៊ីល THAAD ពីសំណាក់សហរដ្ឋអាមេរិកនៅលើទឹកដីកូរ៉េខាងត្បូង ប៉ុន្តែព្រមពេលជាមួយគ្នា ភាគីទាំងពីរមិនបានបញ្ជាក់ឱ្យបានច្បាស់ឡើយពីវិធានការទាំងនោះ។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃសុក្រ ទី១៣ ខែមករា ឆ្នាំ២០១៧។
យោងតាមសេចក្ដីប្រកាសព័ត៌មានដែលស៊ិនហួរទទួលបាន វិធានការទប់ស្កាត់នឹងត្រូវធ្វើឡើងក្នុងគោលបំណងការពារផលប្រយោជន៍ និងតុល្យភាពយុទ្ធសាស្ត្ររបស់ចិន និងរុស្ស៊ីនៅក្នុងតំបន់។ សេចក្ដីប្រកាសព័ត៌មានដដែលក៏បានឱ្យដឹងដែរថា ទីក្រុងប៉េកាំង និងទីក្រុងមូស្គូបានជំរុញឱ្យសហរដ្ឋអាមេរិក និងកូរ៉េខាងត្បូងឆ្លើយតបនឹងការព្រួយបារម្ភរបស់ខ្លួនជុំវិញបញ្ហាសន្តិសុខ ព្រមទាំងបញ្ឈប់គំរោងដាក់ពង្រាយ THAAD នៅក្នុងតំបន់ឧបទ្វីបកូរ៉េ។
សម្រាប់ទីក្រុងសេអ៊ូល និងទីក្រុងវ៉ាស៊ីនតោនការដាក់ពង្រាយ THAAD គឺជាវិធានការការពារសុទ្ធសាធ ទប់ទល់នឹងមីស៊ីលកូរ៉េខាងជើងតែប៉ុណ្ណោះ មិនមានគោលដៅឬក៏ផ្ដល់ផលប៉ះពាល់ដល់ប្រទេសណាមួយផ្សេងនៅក្នុងតំបន់នោះទេ។ ក៏ប៉ុន្តែទោះបីជាបែបនេះក្ដី រុស្ស៊ីនិងចិនបានជំទាស់យ៉ាងខ្លាំងហើយថែមទាំងបានអះអាងជាច្រើនដងថា ការដាក់ពង្រាយ THAAD ជាការគំរាមកំហែងមួយដល់សន្តិសុខជាតិ និង មានតែធ្វើឱ្យស្ថានភាពនៅក្នុងតំបន់ឧទ្វីបកូរ៉េកាន់តែតានតឹងប៉ុណ្ណោះ។
គួរបញ្ជាក់ថា ចិននិងរុស្ស៊ីបានធ្វើសមយុទ្ធយោធារួមគ្នាប្រឆាំងមីស៊ីលកាលពីខែឧសភា ឆ្នាំ២០១៦ បន្ទាប់ពីទីក្រុងវ៉ាស៊ីនតោន និងទីក្រុងសេអ៊ូលចាប់ផ្ដើមពិភាក្សាគ្នាលើគំរោងដាក់ពង្រាយ THAAD លើទឹកដីកូរ៉េខាងត្បូង។ ជាងនេះទៅទៀតចិននិងរុស្ស៊ីក៏បានប្រកាសកាលពីខែតុលាដែរថានឹងធ្វើសមយុទ្ធយោធារួមគ្នាជាលើកទី២ នៅក្នុងឆ្នាំ២០១៧នេះ៕
