(ម៉ានីល)៖ នាយករដ្ឋមន្រ្តីជប៉ុនលោក ស៊ីនហ្សូ អាបេ បានសម្តែងក៏ដូចជាផ្តល់ការគាំទ្រយ៉ាងពេញទំហឹង ចំពោះសង្រ្គាមបង្រ្កាបគ្រឿងញៀន ដោយបង្ហូរឈាមដ៏ចម្រូងចម្រាសរបស់លោកប្រធានាធិបតី រ៉ូឌ្រីហ្គោ ឌូតឺតេ ដែលមានរហ័សនាមថា ជាបុរសខ្លាំងហ្វីលីពីន នាថ្ងៃព្រហស្បតិ៍នេះ ខណៈពេលដែលមេដឹកនាំទាំងពីររូបបានជួបពិភាក្សាគ្នា នៅឯរដ្ឋធានីម៉ានីល នៃប្រទេសហ្វីលីពីន។ នេះបើតាមការចេញផ្សាយដោយសារព័ត៌មាន Channel News Asia នៅយប់ថ្ងៃព្រហស្បតិ៍ ទី១២ ខែមករា ឆ្នាំ២០១៧។
ថ្លែងក្នុងជំនួបជាមួយលោក រ៉ូឌ្រីហ្គោ ឌូតឺតេ នៅឯវិមានប្រធានាធិបតីហ្វីលីពីនលោក ស៊ីនហ្សូ អាបេ បាននិយាយដូច្នេះថា «ពាក់ព័ន្ធនឹងការបង្រ្កាបគ្រឿងខុសច្បាប់ យើងមានបំណងចង់ធ្វើការសហការជាមួយរដ្ឋាភិបាល ទីក្រុងម៉ានីល សំដៅរិះរកវិធានការពាក់ព័ន្ធនានាដើម្បីជួយជ្រោមជ្រែងប្រទេសហ្វីលីពីន» ហើយលោក អាបេ ក៏បានលើកឡើងដែរថា ជប៉ុនរីករាយជានិច្ច ក្នុងការផ្តល់ជាមជ្ឈមណ្ឌលកែប្រែគ្រឿងញៀន និងកម្មវិធីព្យាបាលផ្សេងៗ។
ទន្ទឹមនឹងនេះលោក រ៉ូឌ្រីហ្គោ ឌូតឺតេ បានឆ្លើយតបទៅវិញថា៖ «ស្របពេលដែលហ្វីលីពីនបន្តអនុវត្តយុទ្ធនាការរបស់ខ្លួន ដើម្បីកម្ចាត់អំពើរត់ពន្ធគ្រឿងញៀន យើងសូមទទួលស្វាគមន៍ចំពោះការបង្ហាញពីទឹកចិត្តដ៏ល្អរបស់ភាគីជប៉ុន ក្នុងការជួយគាំទ្រវិធានការសំដៅដោះស្រាយបញ្ហា នៃការខាតបង់ដ៏ច្រើនសន្ធឹកសន្ធាប់ ដែលបង្កឡើងដោយគ្រឿងញៀន»។
គួរបញ្ជាក់ថា យុទ្ធនាការកណ្តាប់ដៃដែកដើម្បីការបង្រ្កាបឧក្រិដ្ឋកម្មគ្រឿងញៀនដែលដឹកនាំលោក រ៉ូឌ្រីហ្គោ ឌូតឺតេ ត្រូវបានបណ្តាញព័ត៌មាននៅជុំវិញពិភពលោក ចុះផ្សាយថា បានសម្លាប់ជីវិតមនុស្សជាង៦,០០០នាក់នៅប្រទេសហ្វីលីពីន គិតចាប់តាំងពីរូបលោកបានជាប់ឆ្នោត ជាប្រធានាធិបតីកាលពីពាក់កណ្តាលឆ្នាំ២០១៦កន្លងទៅនេះ ហើយដោយសារតែរឿងនេះលោក ឌូតឺតេ បានទទួលរងការរិះគន់ជាច្រើនពីសំណាក់សហរដ្ឋអាមេរិក សហភាពអឺរ៉ុប ក៏ដូចជាអង្គការសហប្រជាជាតិ និងអង្គការសិទ្ធិមនុស្សផ្សេងៗដទៃទៀតផងដែរ។
ដោយឡែកចំពោះការបំពេញទស្សនកិច្ចចំនួនពីរថ្ងៃរបស់លោកនាយករដ្ឋមន្រ្តីជប៉ុន ស៊ីនហ្សូ អាបេ វិញ គឺជាដំណើរមកកាន់ប្រទេសហ្វីលីពីន ជាលើកដំបូងបំផុត ដែលត្រូវបានធ្វើឡើងដោយមេដឹកនាំបរទេស បើគិតចាប់តាំងតែពីពេលលោក រ៉ូឌ្រីហ្គោ ឌូតឺតេ បានក្លាយជាមេដឹកនាំហ្វីលីពីន ដែលប្រការនេះបានស្តែងឲ្យឃើញអំពីសារៈសំខាន់របស់ប្រទេសជប៉ុន ក្នុងនាមជាដៃគូពាណិជកម្ម និងជាអ្នកផ្តល់ជំនួយដ៏ជិតស្និទ្ធបំផុត របស់ប្រជាជាតិនៅតំបន់អាស៊ីអាគ្នេយ៍មួយនេះ៕
