(ហាណូយ)៖ រដ្ឋាភិបាលវៀតណាម បាននឹងកំពុងសម្លឹងឃើញពីលទ្ធភាពនៃការពង្រឹងវិស័យការពារដែនអាកាសរបស់ខ្លួន ហើយដើម្បីសម្រេចគោលបំណងនេះទីក្រុងហាណូយ អាចនឹងបញ្ជាទិញប្រព័ន្ធមីស៊ីលការពារដែនអាកាស S-400 Triumph។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃព្រហស្បតិ៍ ទី១២ ខែមករា ឆ្នាំ២០១៧។
យោងតាមសារព័ត៌មានវៀតណាម ទីក្រុងហាណូយ មានចំណាប់អារម្មណ៍ជាខ្លាំងលើ S-400 Triumph ដោយក្រសួងការពារជាតិ កំពុងស្ថិតនៅក្នុងដំណាក់កាល នៃកិច្ចចរចាទិញប្រព័ន្ធមីស៊ីលការពារដែនអាកាសនេះពីរុស្ស៊ី។ ដោយឡែកជុំវិញព័ត៌មាននេះដែរ ថ្លែងនៅក្នុងបទសម្ភាសន៍ជាមួយ Sputnik វីរៈសេនីយ៍ឯកកងទ័ពវៀតណាម លោក Nguyen Khac Nguet បានគូសបញ្ជាក់ថា រុស្ស៊ីគឺជាដៃគូដ៏ចំណាស់របស់វៀតណាម ជាដៃគូដ៏សំខាន់ និងទុកចិត្តជាទីបំផុតនៅក្នុងកិច្ចសហប្រតិបត្តិការបច្ចេកទេសយោធា។
ជាងនេះទៅទៀត លោក Khac Nguet ក៏បានរំលឹកឡើងវិញដែរថា កងទ័ពវៀតណាមបានស្គាល់បទពិសោធន៍ដ៏ធំមួយនៅក្នុងអំឡុងសង្រ្គាមវៀតណាម នោះគឺការប្រើប្រាស់មីស៊ីលផ្ដល់ដោយអតីតសហភាពសូវៀត ហើយតាមរយៈជំនួយនេះកងទ័ពវៀតណាមបាញ់កម្ទេចយន្ដហោះចម្បាំងអាមេរិក ១,៣០០គ្រឿង ក្នុងរួមមានទំាងយន្ដហោះទម្លាក់គ្រាប់បែក B-52។ «សព្វាអាវុធរបស់រុស្ស៊ីបានជួយយើងនៅក្នុងសម័យសង្រ្គាមតស៊ូប្រឆាំងនឹងការឈ្លានពានពីបរទេស និង បានបង្ហាញពីតាក់ទិចរបស់កងទ័ពប្រជាមានិតវៀតណាម»។ នេះបើតាមសម្ដីរបស់លោក Khac Nguet។
គួរបញ្ជាក់ថាប្រព័ន្ធមីស៊ីលការពារដែនអាកាសរុស្ស៊ីធុន S-400 Triumph មានលទ្ធភាពវាយប្រហារកម្ទេចយន្ដហោះចម្បាំង ឬមីស៊ីលបាញ់ចេញពីនាវាមុជទឹក ក្នុងរយៈចំងាយ ៤០០គីឡូម៉ែត្រព្រមទាំងអាចបាញ់ស្ទាក់មីស៊ីលផ្លោងដែលមានល្បឿន ៤,៨គីឡូម៉ែត្រក្នុងមួយវិនាទីនៅចំងាយ ៦០គីឡូម៉ែត្រ។ បន្ថែមពីលើនេះបច្ចុប្បន្នវៀតណាមបានជំនួសមីស៊ីលអតីតសហភាពសូវៀត ដោយប្រព័ន្ធមីស៊ីល Tor BUK និង S-300 ក៏ដូចជាដាក់ឱ្យដំណើរការរួចហើយដែរនូវប្រព័ន្ធមីស៊ីលរុស្ស៊ី R-73 H-59MK និងមីស៊ីល H-35 Uran៕
