(កូឡាឡាពួរ)៖ មន្រ្តីប៉ូលិស​ម៉ាឡេស៊ី​បានបណ្តេញក្រុមសិស្ស​និស្សិត​ជនជាតិ​ឥណ្ឌូណេស៊ី​ចំនួន​ ០៨នាក់ទៅ​កាន់​មាតុប្រទេស​វិញក្រោយ​ពេល​​​ដែល​​ម្នាក់​នៅក្នុង​ចំណោម​ពួកគេ​ត្រូវបានរកឃើញថា​ មានទូរស័ព្ទដៃមួយគ្រឿងដែលផ្ទុក​ទៅដោយ​រូបភាព​ជាច្រើនសន្លឹក​ពាក់ព័ន្ធនឹង​​ក្រុមសកម្ម​ប្រយុទ្ធ ISIS។ នេះបើតាម​​សេចក្តីរាយការណ៍​ពីទីភ្នាក់ងារ​ព័ត៌មាន​រដ្ឋម៉ាឡេស៊ី​ឈ្មោះថា Bernama ដែល​ចេញ​ផ្សាយ​ដោយ​ទីភ្នាក់ងារ​ព័ត៌មាន​ចិន ស៊ិនហួរ នៅមុននេះបន្តិចនារសៀលថ្ងៃព្រហស្បតិ៍ ទី១២ ខែមករា ឆ្នាំ២០១៧។

ដោយផ្អែកលើ​ប្រភព​មួយ​ពី​អង្គភាព​បង្រ្កាប​អំពើភេរវកម្ម​ដែលស្ថិតក្រោម​សហព័ន្ធ​ប៉ូលិស​ម៉ាឡេស៊ី ទីភ្នាក់ងារ​ព័ត៌មាន Bernama បានធ្វើ​សេចក្តីរាយការណ៍​ថា​សិស្សនិស្សិត​ចំនួន​ ០៨នាក់ត្រូវបាន​ប្រគល់ខ្លួន​ដោយមន្រ្តី​ត្រួតពិនិត្យ​ព្រំដែន​របស់​ប្រទេស​សិង្ហបុរី ដែលបាន​រកឃើញ​​​រូបភាព​ដែលមាន​ជាប់ពាក់ព័ន្ធ​នឹងក្រុម ISIS នៅក្នុង​ទូរស័ព្ទ​ដៃរបស់​សិស្សម្នាក់ ក៏ដូចជា​គ្រាប់បែក​ច្នៃចំនួន​មួយគ្រាប់​ផងដែរ ហើយ​​បន្ទាប់​ពី​​បាន​​ធ្វើការ​​សាក​​សួរ​ទៅកាន់​ក្រុមជនសង្ស័យ​ខាងលើ កម្លាំង​ប៉ូលិស​ម៉ាឡេស៊ី​បានស្វែងរក​ឃើញថា​រូបភាព​ទាំងនោះ​ទទួលបាន​តាម​រយៈ​កម្មវិធី​ទំនាក់ទំនង WhatsApp។

យោងតាមប្រភព​ដដែល​ជនសង្ស័យទាំង ០៨នាក់​ដែលមកពីសាលារៀនមួយ​កន្លែងនៅខេត្ត West Sumatra ឥណ្ឌូណេស៊ី​បានធ្វើ​ដំណើរ​មកកាន់​ប្រទេសម៉ាឡេស៊ី​ក្នុងគោល​បំណង​ស្វែងរក​ការព្យាបាល​ជំងឺ​ចាប់ពី​ថ្ងៃទី០៤ ខែមករា ឆ្នាំ២០១៧នេះ និងបាន​ចំណាយពេល​ចំនួន​ប៉ុន្មាន​ថ្ងៃ​​នៅ​ខេត្ត​ Pattani ប្រទេសថៃ ដើម្បី​សិក្សា​ស្វែងយល់​អំពីប្រព័ន្ធ​អប់រំ​នៅឯវិទ្យាស្ថាន​អប់រំ​អ៊ីស្លាមនៅ​ទីនោះ ក៏ប៉ុន្តែ​គេពុំទាន់​បានរក​ឃើញ​ពីមូល​ហេតុ​ដែលនាំ​ឲ្យពួកគេ​ប៉ុនប៉ង​ចូលទៅកាន់​ទឹកដី​ប្រទេសសិង្ហបុរី​តាម​រយៈរដ្ឋ Johor នៃ​ប្រទេសម៉ាឡេស៊ី​នៅឡើយទេ។

គួរបញ្ជាក់ដែរថា ជនសង្ស័យ​ដែលជា​សិស្សនិស្សិត​ទាំង​ ០៨នាក់ត្រូវបាន​ប៉ូលិស​បញ្ជូនចេញពី​ប្រទេស​ម៉ាឡេស៊ី​​កាលពីថ្ងៃពុធម្សិលមិញ​​តាមរយៈ​សាឡង់ ឆ្ពោះទៅកាន់​​កោះ Batam ប្រទេស​ឥណ្ឌូណេស៊ី ដែលជាទឹកដី​កំណើតរបស់​ពួកគេវិញ៕