(អាមេរិក)៖ សន្និសីទសារព័ត៌មានផ្លូវការជាលើកដំបូង ត្រូវបានប្រធានាធិបតជាប់ឆ្នោតអាមេរិកលោក ដូណាល់ ត្រាំ ធ្វើឡើងនៅក្នុងអគារពាណិជ្ជកម្ម Trump Tower ក្នុងទីក្រុងញូយ៉ក ដោយលោកបានអញ្ជើញ​ភ្នាក់ងារសារព័ត៌មានល្បីៗជាច្រើនចូលរួម ក្នុងនោះមានទាំងសារព័ត៌មានប្រឆាំង និងគាំទ្ររូបលោកផងដែរ រួមទាំងសារព័ត៌មាន CNN។ នេះបើតាមការផ្សាយរបស់សារព័ត៌មាន BBC ដែលត្រូវបានដកស្រង់នាព្រឹក​ថ្ងៃព្រហស្បតិ៍ ទី១២ ខែមករា ឆ្នាំ២០១៧។

ប្រធានាធិបតីអាមេរិកជាប់ឆ្នោត លោក ដូណាល់ ត្រាំ បានប្រើពាក្យសម្ដីធ្ងន់ៗទៅកាន់អ្នកសារព័ត៌​មាន​នៃទូរទស្សន៍ CNN​ និងគេហទំព័រព័ត៌មានមួយឈ្មោះថា BuzzFeed ដោយលោកបានហៅ CNN ថាអ្នកផ្សាយ «ព័ត៌មាន​ក្លែងក្លាយ» ហើយ BuzzFeed គឺជាគំនរសំរាម។

ការលើកឡើងបែបនេះរបស់លោក ត្រាំ ធ្វើឡើងនៅ​ក្នុងឱកាស​ធ្វើសន្និសីទសារព័ត៌មាន​ជាលើក​ដំបូង​នៅឯអាគារ​ Trump Tower​។ ប៉ុន្តែទន្ទឹមគ្នានោះដែរ​ លោកបាន​បដិសេធ​ឆ្លើយនឹង​សំណួរ​អ្នកសារព័ត៌មាន CNN ​ហើយថែម​ទំាងបន្ទោស​អ្នកសារព័ត៌មាន​រូបនេះ​​ចំៗ​ដូច្នេះ​ថា៖ «ទេ ! មិនជាអ្នកទេ ព្រោះប្រព័ន្ធផ្សព្វផ្សាយ​របស់អ្នក​គឺជា​ព័ត៌មាន​ក្លែងក្លាយ (...) អ្នកគួរតែ​នៅ​ស្ងៀម ហើយទុកឱ្យ​ស្ត្រីម្នាក់នោះ​សួរសំណួរ... អ្នកឯងកុំឈ្លើយ! ខ្ញុំនឹង​មិនឆ្លើយនឹង​សំណួររបស់​អ្នកទេ»។ បន្ថែមពីលើនេះ​លោក ដូណាល់ ត្រាំ ក៏បានហៅ គេហទំព័រព័ត៌មាន BuzzFeed ដែលជា​អ្នកបញ្ចេញ​រឿងអាស្រូវ​ផ្លូវភេទ​របស់លោកនៅអំឡុង​យុទ្ធនាការ​ឃោសនាបោះឆ្នោត​ថា​ «គ្រាន់តែគឺជាគំនរសំរាមប៉ុណ្ណោះ»៕