(តៃប៉ិ)៖ ភាពតានតឹងខ្លាំងរវាងតៃវ៉ាន់ និងចិនបានកក្រើកឡើងវិញនៅថ្ងៃពុធនេះ ខណៈដែលកងទ័ពជើងទឹក​និងកងយន្តហោះចម្បាំងនៃកោះតៃវ៉ាន់ បានទទួលបញ្ជាឲ្យ​ចេញប្រតិបត្តិការឃ្លាំមើល ក៏ព្រោះតែនាវាដឹក យន្តហោះចម្បាំងដ៏ធំរបស់ប្រទេសចិន បានចល័តទៅទិសខាងជើងឆ្លងកាត់តាម​ច្រកសមុទ្រនៃកោះតៃវ៉ាន់។ នេះបើតាម​សារព័ត៌មាន Channel News Asia ដកស្រង់ពីទីភ្នាក់ងារ Reuters នៅមុននេះបន្តិច​នាព្រឹក​ថ្ងៃពុធ ទី១១ ខែមករា ឆ្នាំ២០១៧។

ជុំវិញព័ត៌មាននេះ កន្លងមកភាគីចិនធ្លាប់បានអះអាងរួចមកហើយថា នាវាដឹកយន្តហោះចម្បាំង Liaoning បានត្រឡប់មកពីធ្វើសមយុទ្ធយោធា​នៅសមុទ្រចិនខាងត្បូង ហើយមិនបានធ្វើការឆ្លងចូលអធិបតេយ្យភាព​ដែនទឹករបស់កោះតៃវ៉ាន់នោះហើយ។ ប៉ុន្តែឆ្លើយតបនឹងបញ្ហានេះកោះតៃវ៉ាន់ បានសម្រេចបញ្ជូនកង​យន្តហោះចម្បាំង និងនាវាកងទ័ពជើង​ទៅឃ្លាំមើលសកម្មភាព​របស់នាវាចិន​នៅជិតខ្សែបន្ទាត់បែងចែកដែន​ទឹកដ៏ស្តួចស្តើង​រវាងចិន និងតៃវ៉ាន់។

អ្នកនាំពាក្យក្រសួងការពារជាតិកោះតៃវ៉ាន់ លោក Chen Chung-chi បានលើកឡើងជុំវិញបញ្ហាខាងលើនេះ​យ៉ាងដូច្នេះថា «យើងអាចក្តោបក្តាប់ស្ថានការណ៍​បានយ៉ាង​ពេញ​លេញ ចំពោះការវិវឌ្ឍន៍ចលនានេះ។ យើងបានបញ្ជូនកងនាវាចម្បាំង និងកងទ័ពជើងទឹកទៅធ្វើការតាមដាន​សកម្មភាពរបស់​នាវាចិននោះហើយ​»។ ប្រទេស​ចិនបាន​បញ្ជាក់​ជុំវិញ​បញ្ហានេះទៀតថា នាវា Liaoning បានចេញប្រតិបត្តិការសមយុទ្ធបាញ់​គ្រាប់ពិត ដើម្បីបង្កើនសមត្ថភាពនៅសមុទ្រចិនខាងត្បូង ហើយខ្លួនធ្វើនេះ​ទៅស្រប​ទៅតាមច្បាប់អន្តរជាតិ។

គួរបញ្ជាក់ថាលោក ត្សៃ អ៊ីងវិន ប្រធានាធិបតីកោះតៃវ៉ាន់ដែលមានទំនោរទាមទារឯករាជ្យភាពពីចិននោះ កំពុងតែធ្វើធ្វើទស្សនកិច្ចនៅបណ្តាប្រទេស នៃតំបន់អាមេរិក​កណ្តាល​មួយចំនួន ដែលជាសម្ព័ន្ធមិត្តកោះតៃវ៉ាន់ ហើយក្នុងនោះលោកស្រី​​ក៏បានឆ្លងកាត់​សហរដ្ឋអាមេរិក និងបានជួបពិភាក្សា​ជាមួយមន្ត្រី​អាមេរិកមួយចំនួន​ថែម​ទៀតផង ដែលជាហេតុធ្វើឲ្យ​ទីក្រុងប៉េកាំងក្តៅស្លឹកត្រចៀកយ៉ាងខ្លាំង៕