(ម៉ានីល)៖ ជនប្រដាប់​អាវុធ​មានគ្នា​ប្រាំនាក់​បានបើក ការ​វាយប្រហារ​ទៅលើ​ទូកនេសាទ​មួយគ្រឿង​នៅក្បែរ​ក្រុង Zamboanga ភាគខាងត្បូង​​ប្រទេស​ហ្វីលីពីន ដែលបាន​បណ្តាលឲ្យ​មនុស្សនៅលើទូក​យ៉ាងតិច​ចំនួន ​០៨នាក់​បាត់បង់​ជីវិត។ នេះបើតាម​ការចេញ​ផ្សាយ​ដោយ​សារព័ត៌​មាន Channel News Asia នៅមុន​នេះ​បន្តិច​នារសៀល​ថ្ងៃអង្គារ ទី១០ ខែមករា ឆ្នាំ២០១៧។

លោក Filemon Tan អ្នកនាំពាក្យ​កងទ័ព​ជើងគោក​ហ្វីលីពីន​បានថ្លែងថា​ទូកនេសាទ​ខាងលើផ្ទុក​មនុស្ស​សរុប​ចំនួន​ ១៥នាក់​ដែលជា​អ្នក​បំរើ​ការ​នៅលើនោះ​បានទទួលរង​ការវាយប្រហារ​ពីសំណាក់​ក្រុមជន​ប្រដាប់អាវុធ​ដែលមាន​កាណូតជា​យានជំនិះ នាវេលា​ម៉ោង​ប្រហែល​ ​៧៖៣០​នាទីព្រឹកអង្គារនេះ នៅលើផ្ទៃ​សមុទ្រ​ក្បែរក្បែរ​ភូមិ Dita ក្នុងទីក្រុង Zamboanga នៃកោះ Laud Siromon។

លោក Tan បានបញ្ជាក់ថា «មនុស្សនៅលើ​ទូកនេសាទ​ចំនួន​ ០៨នាក់បានស្លាប់នៅក្នុងហេតុការណ៍​នេះ ហើយសមាជិក​បំរើការ​នៅលើនោះ​​ចំនួន​ប្រាំនាក់​ផ្សេង​ទៀត បានលោតចុះពីលើទូកហើយ​បាន​រួចរស់​ជីវិត​ពីការវាយប្រហារ​ដោយធ្វើការ​ហែលសំដៅ​ទៅកាន់ដីកោះ​ដែលនៅ​ក្បែរ​ខាង ខណៈពីរ​នាក់​ទៀត​​ដែលបានសម្រេចចិត្ត​នៅលើទូក​មិនព្រមចាកចេញ​ក៏ពុំបាន​ទទួលរងគ្រោះ​ថ្នាក់អ្វីដែរ»

មន្រ្តីយោធា​ខាងលើ​ដដែល​បានបន្ថែមជា​ចុងក្រោយថា គំនុំសង​សឹកគ្នា​ឬមួយ​ក៏ការគំរាម​ជំរិតយកប្រាក់​អាចជាមូលហេតុ​ស្ថិតនៅ​ពីក្រោយ​​ការវាយប្រហារ​នេះ ហើយកម្លាំង​ប៉ូលិស​ក៏ដូចជា​កងទ័ពត្រូវបានបញ្ជូន​ទៅកាន់​កន្លែងកើតហេតុ​ដើម្បីត្រួតពិនិត្យ​លើករណី​នេះ៕