(កាណាដា)៖ យោងតាមការ​ចេញផ្សាយដោយ​​សារព័ត៌មាន Sputnik នៅមុននេះបន្តិច​នាព្រឹកថ្ងៃ​ចន្ទ ទី០៩ ខែមករា ឆ្នាំ២០១៧ ​បាន​ឲ្យ​ដឹងថា​គ្រោះធម្មជាតិ​រញ្ជួយដី​កំរិត ៥.៨រ៉ិចទ័រ បានវាយប្រហារ​មកលើតំបន់ Nunavut នៃភាគខាងជើង​ប្រទេស​កាណាដា ហើយដែល​គ្រោះរញ្ជួយដីនេះ​បានកើតឡើងបន្ទាប់ពី គ្រោះរញ្ជួយដី​មួយផ្សេង​ទៀត​កំរិត ៥.៥រ៉ិចទ័រក៏បានវាយប្រហារ​មកលើ​តំបន់​ឆ្នេរភាគខាងលិច​នៃទីក្រុង Port Hardy កាលពី​ព្រឹកថ្ងៃសៅរ៍ កន្លងទៅផងដែរ។

ទីភ្នាក់ងារស្ទាបស្ទង់​ភូមិសាស្រ្ត​អាមេរិក USGS បានបញ្ជាក់ថា ចំណុចរំញ័រ​របស់គ្រោះ​មហន្តរាយ​ធម្មជាតិខាង​លើ​ស្ថិតនៅ​ចំងាយ ៨៦គីឡូម៉ែត្រពីភាគខាងជើង​ប្រទេស​កាណាដា ព្រមទាំងមានជំរៅរញ្ជួយ ១៩គីឡូម៉ែត្រ​ទៅក្នុងដី។ ក៏ប៉ុន្តែភ្លាមៗពុំទាន់មានសេចក្តី​រាយការណ៍ពី​ការខូចខាត​ឬជនរងគ្រោះ​ណាមួយ​ឡើយ ហើយ​គ្រោះ​រញ្ជួយ​ដី​​នេះ​ក៏​​មិនបាន​បង្កជារលកយក្សស៊ូណាមិនោះដែរ៕​​