(វ៉ាស៊ីនតោន)៖ ការតែងតាំងនាយកប្រតិបត្តិក្រុមហ៊ុនប្រេង ExxonMobil លោក រិច ធៀលលឺសុន (Rex Tillerson) ក្នុងនាមជារដ្ឋមន្ត្រីការបរទេសអាមេរិក នៃរដ្ឋាភិបាលរបស់លោក ដូណាល់ ត្រាំ មិនទាន់អាចយកជាការបានឡើយ ដោយនៅត្រូវរង់ចាំការ អនុម័តយល់ព្រមពីព្រឹទ្ធសភាអាមេរិកជាមុនសិននៅខែមករានេះ ខណៈអ្នកជំនាញមួយចំនួនយល់ថា លោក ធៀលលឺសុន អាចនឹងត្រូវបានគេដកបេក្ខភាពពីតំណែងវិញ។ នេះបើតាមអ្នកវិទ្យាសាស្ត្រនយោបាយបារាំង លោក ហ្សង់ អេរីគ ប្រាណា (Jean-Eric Branaa) ដែលចុះផ្សាយបន្តដោយសារព័ត៌មាន Sputnik នៅថ្ងៃអាទិត្យ ទី០៨ ខែមករា ឆ្នាំ២០១៧។
លោក រិច ធៀលលឺសុន ត្រូវបានលោក ដូណាល់ ត្រាំ តែងតាំងជារដ្ឋមន្ត្រីការបរទេស កាលពីពាក់កណ្ដាលខែធ្នូ ឆ្នាំ២០១៦។ រីឯក្រុមអ្នកជំនាញមួយចំនួនក៏បានជឿជាក់ដែរថា លោក ធៀលលឺសុន អាចនឹងធ្វើឱ្យទំនាក់ទំនងរុស្ស៊ីនិងសហរដ្ឋអាមេរិកប្រសើរឡើងវិញ តាមរយៈការប្រើប្រាស់ទំនាក់ទំនងល្អរបស់លោក ជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន។ ក៏ប៉ុន្តែ ទោះជាយ៉ាងនេះក្ដី អ្នកវិទ្យាសាស្ត្រនយោបាយបារាំង លោក ហ្សង់ អេរីគប្រាណា បានកត់សម្គាល់ថា ការតែងតាំងនាយកប្រតិបត្តិក្រុមហ៊ុនប្រេងរូបនេះ ជារដ្ឋមន្ត្រីការបរទេស ទំនងនឹងមិនត្រូវបានព្រឹទ្ធសភាអាមេរិកអនុម័តឡើយ។
«បច្ចុប្បន្ន ការតែងតាំងនេះនៅត្រូវរង់ចាំការអនុម័ត ពីព្រឹទ្ធសភាអាមេរិកនិងគណៈកម្មាធិការកិច្ចការបរទេស។ គណៈកម្មាការនេះមានសមាជិក១៩រូប ក្នុងនោះមាន១០រូប មកពីគណបក្សសាធារណរដ្ឋ និង៩រូបទៀតមកពីគណបក្សប្រជាធិបតេយ្យដែលមានទំនោរជំទាស់នឹងការតែងតាំងលោក ធៀលលឺសុន។ ដូច្នេះនៅ ក្នុងស្ថានភាពបែបនេះ បើសិនជា សមាជិកសាធារណរដ្ឋណាម្នាក់ បោះឆ្នោតជំទាស់នោះ បេក្ខភាពលោក ធៀលលឺសុន នឹងត្រូវចាត់ទុក ជាមោឃៈ ហើយលោកត្រាំ ក៏អាចនឹងជ្រើសបេក្ខភាពផ្សេងទៀតផងដែរ»។ នេះបើតាមសម្ដី លោក ហ្សង់ អេរីគ ប្រាណា នៅក្នុងបទសម្ភាសន៍ជាមួយស្ថានីយ៍ទូរទស្សន៍ប៊ែលហ្សិក RTBF។
សូមជំរាបថា បើតាមលោកហ្សង់ អេរីគ ប្រាណា សេចក្ដីថ្លែងការណ៍នយោបាយរបស់លោក ដូណាល់ ត្រាំ មិនមែនសុទ្ធតែធ្វើឱ្យ សមាជិក បក្សសាធារណរដ្ឋទាំងអស់ពេញចិត្តនោះទេ ជាឧទាហរណ៍ ព្រឹទ្ធសមាជិកសភា នៃគណបក្សសាធារណរដ្ឋ លោក ចន ម៉ាកខេន (John McCain) ធ្លាប់បានរិះគន់លោកត្រាំ ថាក្បត់កាតព្វកិច្ចរបស់គណបក្សសាធារណរដ្ឋ ហើយក៏គ្មានកន្លែងទំនេរ សម្រាប់លោកត្រាំ នៅក្នុងនយោបាយអាមេរិកនោះដែរ។ លោក ដូណាល់ ត្រាំ និងរដ្ឋាភិបាលថ្មីរបស់លោកនឹងចូលស្បថកាន់ តំណែងជាផ្លូវការ នៅថ្ងៃទី២០ ខែមករា ខាងមុខនេះ៕
លោក រិច ធៀលលឺសុន (Rex Tillerson)
