(តៃប៉ិ)៖ ប្រធានាធិបតី​តៃវ៉ាន់​លោកស្រី ត្សៃ អ៊ីងវិន (Tsai Ing-Wen) នៅថ្ងៃសៅរ៍នេះ​បានចាកចេញ​ពីកោះតៃវ៉ាន់​ឆ្ពោះ​ទៅកាន់​​សហរដ្ឋ​អាមេរិក នៅក្នុងដំណើរ​​ទស្សនកិច្ច​នៅតំបន់​អាមេរិក​កណ្តាល​របស់​លោកស្រី ដែលនឹង​ស្ថិតក្រោម​ការឃ្លាំមើល​យ៉ាងដិតដល់​ពីទីក្រុង​ប៉េកាំង ដែលបានផ្ទុះកំហឹង​ដោយសារ​តែ​រូបលោកស្រី​បានហៅទូរស័ព្ទ​ដើម្បីអបអរសាទរ​ ប្រធានាធិបតីជាប់ឆ្នោតអាមេរិកលោក ដូណាល់ ត្រាំ។ នេះបើតាមការ​ចេញ​ផ្សាយ​ដោយ​សារព័ត៌មាន Channel News Asia នៅមុននេះបន្តិច​នាព្រឹកថ្ងៃសៅរ៍ ទី០៧ ខែមករា ឆ្នាំ២០១៧។

លោកស្រី ត្សៃ នឹងធ្វើដំណើរ​ទស្សនកិច្ចចំនួន ០៩ថ្ងៃទៅកាន់​បណ្តាប្រជាជាតិ​នៅតំបន់អាមេរិក​កណ្តាល​ដែលជាសម្ព័ន្ធមិត្ត​របស់​កោះតៃវ៉ាន់ ​ហើយការឈប់​ឆ្លងកាត់របស់​លោកស្រី​ ក្នុងទីក្រុង Houston នៃសហរដ្ឋអាមេរិក​នៅសប្តាហ៍នេះ និងក្នុងទីក្រុង San Francisco នៅចុង​សប្តាហ៍ក្រោយ​នឹងស្ថិតក្រោម​ការតាមដាន​យ៉ាងយកចិត្ត​ទុកដាក់​បំផុតពីអន្តរជាតិ​ជាពិសេសនោះ​ គឺប្រទេសចិនតែម្តង​ស្របពេល​ដែល​ភាព​តានតឹង​រវាងភាគី​ទាំងពីរ​​កំពុងកើនឡើង។

ជុំវិញរឿងនេះទីក្រុងប៉េកាំង ​ក៏ធ្លាប់បានទទូច​ឲ្យទីក្រុងវ៉ាស៊ីនតោន​រារាំងមិនឲ្យ​លោកស្រី ត្សៃ ធ្វើដំណើរ​ឆ្លងកាត់​ដែនអាកាស​របស់អាមេរិក​​ផងដែរ។ ដោយឡែក​កាលពី​សប្តាហ៍មុន​ប្រធានាធិបតី​តៃវ៉ាន់​បានបញ្ជាក់ថា «ការឈប់ឆ្លងកាត់ គឺជាការឈប់ឆ្លងកាត់» ​​បន្ទាប់​​ពី​ក្រុម​​​អ្នក​យកព័ត៌មាន​បានចោទសួរថា​តើលោកស្រី​នឹងមានជំនួប​ជាមួយមន្រ្តីណាម្នាក់​ពីក្រុមរដ្ឋ​បាលរបស់លោក ដូណាល់ ត្រាំ ដែរឬយ៉ាងណា ខណៈ​រូបលោក ត្រាំ ផ្ទាល់ទំនងជាបានច្រានចោលចំពោះ ពាក្យចចាមអារ៉ាមដែល​ថា​លោកនឹងជួបជាមួយលោកស្រី ត្សៃ នៅក្នុងដំណើរទស្សនកិច្ច​នេះ ដោយបានថ្លែងថា «វាមិនសូវជាសមរម្យ​នោះឡើយ​ក្នុងការជួបជាមួយ​នរណាម្នាក់ នៅមុនពេល​លោកស្បថ​ចូលកាន់​តំណែង​ជាផ្លូវការ​​នាថ្ងៃទី២០ ខែមករា»

ការិយាល័យប្រធានាធិបតីតៃវ៉ាន់​បានបដិសេធ​មិនផ្តល់​ព័ត៌មាន​លម្អិត​អំពីគំរោង​សកម្មភាព​របស់លោកស្រី ត្សៃ អំឡុងពេលស្នាក់​នៅសហ​រដ្ឋអាមេរិក​បណ្តោះអាសន្ន​នោះឡើយ ហើយលោក Liao Da-Chi ដែលជា​អ្នកវិភាគ​នយោបាយមួយរូបនោះ​ បានលើកឡើងថា​អ្វីដែល​ចិន​ខ្វាយខ្វល់​ជាងគេនោះគឺថា​តើលោកស្រី ត្សៃ ហើយនិងលោក ត្រាំ នឹងជួបគ្នាដែរឬយ៉ាងណា។

គួរបញ្ជាក់ថា​លោកស្រី ត្សៃ អ៊ីងវិន នឹងធ្វើដំណើរ​ទស្សនកិច្ច​ទៅកាន់​ប្រទេស ហុងឌួរ៉ាស (Honduras), នីការ៉ាហ្គ័រ (Nicaragua), ហ្គាតេម៉ាឡា (Guatemala, និង អែលសាល់វ៉ាឌ័រ (El Salvador) ជារដ្ឋទាំងឡាយ​ដែលទទួលស្គាល់តៃវ៉ាន់​ជាផ្លូវការ៕