(មូស៊ូល)៖ កងកម្លាំងរដ្ឋាភិបាលនៃប្រទេសអ៊ីរ៉ាក់ កំពុងតែវាយសំរុកទៅមុខកាន់តែខ្លាំងក្លានៅក្នុងយុទ្ធនាការយោធាទ្រង់ទ្រាយធំ ដើម្បីវាយរំដោះយកទីក្រុងមូស៊ូល (Mosul) ដែលស្ថិតនៅភាគខាងជើងប្រទេសចេញពីកណ្តាប់ដៃរបស់ក្រុមសកម្មប្រយុទ្ធ ISIS។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ិនហួរ នៅមុននេះបន្តិចនារសៀលថ្ងៃព្រហស្បតិ៍ ទី០៥ ខែមករា ឆ្នាំ២០១៧។
នៅក្នុងដំណាក់កាលទីពីរនៃប្រតិបត្តិការយោធា ដែលបានចាប់ផ្តើមកាលពីថ្ងៃទី២៩ ខែធ្នូ ឆ្នាំ២០១៦ ប៉ូលិសសហព័ន្ធនិងកងទ័ពជើងគោកអ៊ីរ៉ាក់នៅថ្ងៃពុធម្សិលមិញ បានដណ្តើមកាន់កាប់សង្កាត់ Wanda ដែលស្ថិតនៅផ្នែកអាគ្នេយ៍នៃទីក្រុង បន្ទាប់ពីមានការប៉ះទង្គិចគ្នាយ៉ាងហាវជាមួយក្រុមសកម្មប្រយុទ្ធជ្រុលនិយម។ នេះបើការសេចក្តីថ្លែងការណ៍របស់ទីបញ្ជាការប្រតិបត្តិការចំរុះនៃប្រទេសអ៊ីរ៉ាក់។
ជ័យជម្នះខាងលើបានជួយឲ្យកងកម្លាំ រដ្ឋាភិបាលកាន់តែខិតជិតទៅដល់កណ្តាលនៃផ្នែកភាគកើតនៃទីក្រុងមូស៊ូល ដែលជាមូលដ្ឋានដ៏ធំបំផុតនិងចុងក្រោយគេរបស់ក្រុមសកម្មប្រយុទ្ធ ISIS នៅប៉ែកខាងជើងនៃប្រទេសអ៊ីរ៉ាក់។
គួរបញ្ជាក់ថា ចាប់តាំងពីយុទ្ធការវាយរំដោះយកទីក្រុងដ៏ធំមួយនេះបានប្រព្រឹត្តទៅកាលពីខែតុលា ឆ្នាំ២០១៦ ប្រតិបត្តិការយោធាបានបង្ខំឲ្យប្រជាជនអ៊ីរ៉ាក់ ដែលរស់នៅក្នុងទីក្រុងមូស៊ូល និងតំបន់ផ្សេងៗទៀតក្បែរនោះ មិនតិចជាង ១២៥,០០០នាក់បាត់បង់ទីជម្រក ហើយការប្រយុទ្ធគ្នានាពេលថ្មីៗនេះបានជំរុញឲ្យប្រជាជនរត់ភៀសខ្លួននៅក្នុងអត្រាពី ១,៦០០នាក់ទៅដល់ ២,៣០០នាក់ជារៀងរាល់ថ្ងៃ៕
