(គូឡាឡាំពួរ)៖ អាជ្ញាធរម៉ាឡេស៊ី បានឃុំខ្លួនជនសង្ស័យម្នាក់ ពីបទចោទប្រកាន់​ថា​មានទំនាក់ទំនង​ជាមួយក្រុម ISIS ក្នុង ការរៀបចំគំរោង​ចូលទៅក្នុង​ទឹកដី​ប្រទេសមីយ៉ាន់ម៉ា ដើម្បីដឹកនាំធ្វើ​សកម្មភាព​​វាយប្រហារ​ភេរវកម្ម។ នេះបើតាម​អាជ្ញាធរប្រយុទ្ធប្រឆាំងភេរវកម្ម​ ដែលចុះផ្សាយ​ដោយសារព័ត៌មាន Channel News Asia នៅយប់ថ្ងៃពុធ ទី០៤ ខែមករា ឆ្នាំ២០១៧។

ជុំវិញបញ្ហានេះដែរ ថ្លែងនៅក្នុងបទសម្ភាសន៍មួយ ប្រធាន​អង្គភាព​ប៉ូលិស​ម៉ាឡេស៊ីប្រឆាំង​ភេរវកម្ម លោក Ayob Khan Mydin Pitchay បានឱ្យដឹងថា ប្រទេសមីយ៉ាន់ម៉ា កំពុងប្រឈមមុខនឹង​ហានិភ័យ​នៃការកើនឡើង​នៃការវាយប្រហារពី​សំណាក់ក្រុមសកម្ម ប្រយុទ្ធ ISIS​ ដែលមានបណ្ដាញ​នៅក្នុងតំបន់អាស៊ីអាគ្នេយ៍។ លោក Ayob បន្ថែមថាជនសង្ស័យខាងលើ គឺជាបុរសជនជាតិ ឥណ្ឌូនេស៊ីម្នាក់ តែមិនបានបញ្ជាក់លម្អិត​ពីអត្តសញ្ញាណនោះទេ ដោយគ្រាន់តែអះអាងថា រូបគេត្រូវបានឃុំខ្លួន​នៅក្នុងប្រទេសម៉ាឡេស៊ី កាលពីខែធ្នូ ឆ្នាំ២០១៦ ហើយគួរតែ​អាចត្រូវបានចោទប្រកាន់​ជាផ្លូវការនៅថ្ងៃពុធនេះ ពីបទកាន់កាប់សម្ភារមានជាប់ពាក់ព័ន្ធ​នឹង ក្រុមភេរវករ។

សូមជំរាបថា យោងតាមលោក Ayob​ បើសិនជាជនសង្ស័យរូបនេះ ត្រូវបានគេរកឃើញថា​បានប្រព្រឹត្តិដូចការចោទប្រកាន់ នោះរូបគេអាចនឹង​ប្រឈមមុខ​នឹងការដាក់ពិន័យ ឬក៏ជាប់ពន្ធនាគាររយៈពេល៧ឆ្នាំ៕