(ប៉េកាំង)៖ កងម៉ារីនចិនបានទទួលស្គាល់ហើយថា នាវាចម្បំាងចិនជាច្រើនគ្រឿងដឹកនាំដោយនាវាដឹកយន្ដហោះចម្បាំង Liaoning បានធ្វើសមយុទ្ធយោធា នៅឯតំបន់សមុទ្រចិនខាងត្បូងហើយ ដែលការអះអាងនេះធ្វើឡើងតែ ប៉ុន្មានថ្ងៃប៉ុណ្ណោះបន្ទាប់ពីកោះតៃវ៉ាន់ បានចោទប្រកាន់ថានាវាចិនជាច្រើនគ្រឿងបានធ្វើដំណើរឆ្លងកាត់ចំងាយប្រហែលជា ១៤៤គីឡូម៉ែត្រតំបន់ដែនទឹករបស់ខ្លួន។ នេះបើតាមការចេញផ្សាយដោយសារព័ត៌មាន Channel News Asia នៅរសៀលថ្ងៃអង្គារ ទី០៣ ខែមករា ឆ្នាំ២០១៧។
ការចល័តរបស់នាវាចម្បំាងចិននៅតំបន់សមុទ្រចិនខាងត្បូងបានធ្វើឱ្យតៃវ៉ាន់ និងជប៉ុនមានការព្រួយបារម្ភ ក៏ដូចជាតាមដានយ៉ាងយកចិត្តទុកដាក់លើសកម្មភាពនាវាចម្បាំងចិនទាំងនេះ។ ក៏ប៉ុន្តែខាងភាគីទីក្រុងប៉េកាំង បញ្ជាក់ម្ដងហើយម្ដងទៀតថា ការចល័តនាវាចម្បាំងរបស់ខ្លួនគ្រាន់តែជាផ្នែកមួយនៃការធ្វើសមុយុទ្ធយោធា ជាទម្លាប់ធម្មតាប៉ុណ្ណោះ ហើយអនុឡោមទៅតាមច្បាប់អន្តរជាតិ។ ចំណែកឯកងទ័ពម៉ារីនចិនក៏បានទទួលស្គាល់ដែរថា នាវាដឹកយន្ដហោះចម្បាំង Liaoning បានធ្វើសមយុទ្ធយោធាដែនសមុទ្រ រួមទំាងឧទ្ធម្ភាគចក្រ កាលពីថ្ងៃចន្ទ កន្លងទៅនៅឯតំបន់សមុទ្រចិនខាងត្បូង ប៉ុន្តែមិនបានបញ្ជាក់ពីទីតាំងជាក់លាក់នោះទេ។
គួរបញ្ជាក់ថាចិនបានបង្កើនសកម្មភាពយោធាកាន់តែច្រើននៅក្នុងតំបន់សមុទ្រចិនខាងត្បូង និងខាងកើត ក្រោយមានកិច្ចសន្ទនាតាមទូរស័ព្ទរវាងប្រធានាធិបតីអាមេរិកជាប់ឆ្នោត លោក ដូណាល់ ត្រាំ និងប្រធានាធិបតីតៃវ៉ាន់ លោកស្រី ត្សៃ អ៊ីងវិន កាលពីខែធ្នូ កន្លងទៅ៕
