(មូស្គូ)៖ តាមការចេញផ្សាយដោយសារព័ត៌មាន CNBC និង Reuters នៅមុននេះបន្តិច លោករដ្ឋមន្ត្រី​ការបរទេសរុស្ស៊ី Sergei Lavrov បានដាក់សំណើសុំ​បណ្តេញមន្ត្រីទូត​អាមេរិក​ចំនួន ៣៥រូបទៅកាន់​ប្រធានាធិបតីលោក វ្ល៉ាទីមៀ ពូទីន ដើម្បីសុំការយល់ព្រមហើយនឹងធ្វើការអនុវត្តន៍​វិធានការនោះតែម្តង។ នេះបើតាមព័ត៌មានថ្មីៗខាងលើ ចេញផ្សាយនាល្ងាច​ថ្ងៃសុក្រ ទី៣០ ខែធ្នូ ឆ្នាំ២០១៦។

គួរបញ្ជាក់ថា​ប្រធានាធិបតីអាមេរិក​លោក បារ៉ាក់ អូបាម៉ា ដែលជិតនឹងផុតអាណត្តិទៅហើយនោះ បានធ្វើការបណ្តេញមន្ត្រី​ទូតរុស្ស៊ី និងមន្ត្រីពាក់ព័ន្ធមួយចំនួនទៀត​របស់ទីក្រុង​មូស្គូ ចេញពីទឹកដីអាមេរិក​ក្នុងរយៈពេល ៧២ម៉ោង​នៅថ្ងៃព្រហស្បតិ៍ ទី២៩ ខែធ្នូ (ម៉ោងនៅទីក្រុងវ៉ាស៊ីនតោន) ដោយយោង​លើបទចោទ​ប្រកាន់រុស្ស៊ីថា បានលូកលាន់​ចូល​កិច្ចការបោះឆ្នោតរបស់អាមេរិក ក្នុងនោះ​មានការ Hack លទ្ធផលឆ្នោតផងដែរ។

ចំណាត់ការរបស់អាមេរិកខាងលើនេះ ត្រូវបានវិមានក្រឹមឡាំង ចេញសេចក្តីថ្លែងការណ៍ត្មេះដៀលទីក្រុង​វ៉ាស៊ីនតោនថា កំពុងដើរនយោបាយការបរទេស​ដែលគ្មាននរណា​នឹកស្មានដល់ និងគគ្លើនជាទីបំផុត៕