(ញូដេលី)៖ ទីបញ្ជាការ​ប៉ូលិសជាតិ​ប្រទេសឥណ្ឌា​បានឲ្យដឹងថា បុរសយ៉ាងហោចណាស់​ចំនួន ០៧នាក់​បានបាត់​បង់ជីវិត និងជាង ២០នាក់ផ្សេងទៀត​កំពុងជាប់ខ្លួន​ជាប់នៅ​ក្រោម​គំនរនៃ​កម្ទេចកម្ទីរ​អណ្តូងរ៉ែ​ ដែលបានបាក់ស្រុត​​លើពួកគេ​ នៅការដ្ឋានរុករករ៉ែមួយកន្លែង​ដែលស្ថិតក្នុងរដ្ឋ Jharkhand ភាគ​ខាង​កើត​នៃ​ប្រទេសឥណ្ឌា​។ នេះបើតាមការចេញផ្សាយ​​នៅមុននេះបន្តិច ដោយសារ​ព័ត៌មាន Indian Express នារសៀល​ថ្ងៃសុក្រ ទី៣០ ខែធ្នូ ឆ្នាំ២០១៦។

គ្រឿងចក្រមួយ​ចំនួន​ដែលចូលរួមក្នុង​ធ្វើប្រតិបត្តិការ​ជីកយករ៉ែ​នេះ ក៏បានជាប់ផុងផងដែរ​នៅក្នុង​ហេតុការណ៍​​ខាងលើ​ដែលបាន​កើតឡើង​​តាំង​ពី​​​យប់​ថ្ងៃ​ព្រហស្បតិ៍​​មក​ម្ល៉េះនោះ ហើយ​ឈានចូល​មកដល់​ព្រឹកថ្ងៃសុក្រនេះ​ប្រតិបត្តិការ​ជួយសង្គ្រោះ​នៅតែបន្ត។

គួរបញ្ជាក់ថាអណ្តូង​រ៉ែ​​​ដែល​​ស្ថិត​នៅ​​ក្នុង​​ស្រុក Godda ជាកម្មសិទ្ធិ​របស់ក្រុមហ៊ុន Rajmahal Open Cast Mines ហើយក្រោយកើត​ហេតុភ្លាមៗ ក្រុមសង្គ្រោះ​បាន​បញ្ជូន​​គ្រឿងចក្រ​ប្រមាណ ៤០គ្រឿង​ទៅធ្វើការជីកគាស់ក្នុងន័យសង្គ្រោះកម្មករផ្សេងៗទៀតដែលជាប់ក្នុងការដ្ឋានរ៉ែនោះ។ សម្រាប់មូលហេតុ​ដែលបង្កឲ្យអណ្តូងរ៉ែបាក់នោះ នៅមិនទាន់​មានការបញ្ជាក់​នោះឡើយ៕