(វ៉ាស៊ីនតោន)៖ ប្រធានាធិបតីអាមេរិកជាប់ឆ្នោតលោក បារ៉ាក់ អូបាម៉ា បានឲ្យដឹងថានាថ្ងៃព្រហស្បតិ៍នេះ លោកបានរៀបចំកិច្ចសន្ទនាដ៏ល្អមួយជាមួយលោកប្រធានាធិបតី បារ៉ាក់ អូបាម៉ា បន្ទាប់ពីលោក ត្រាំ បានសរសេរនៅលើបណ្តាញទំនាក់ទំនងសង្គមថា កិច្ចការផ្ទេរតំណែងមិនប្រព្រឹត្តទៅដោយរលូននោះឡើយ។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិចនារសៀលថ្ងៃព្រហស្បតិ៍ ទី២៩ ខែធ្នូ ឆ្នាំ២០១៦។
ថ្លែងទៅកាន់ក្រុមអ្នកយកព័ត៌មាននៅឯកន្លែងសម្រាកលំហែកាយ ម៉ាអាឡាហ្គោ (Mar-a-Lago Resort) របស់លោកផ្ទាល់ លោក ដូណាល់ ត្រាំ បាននិយាយដូច្នេះថា «លោក អូបាម៉ា បានហៅទូរស័ព្ទមកកាន់ខ្ញុំ ហើយពួកយើងទាំងពីរនាក់មានកិច្ចសន្ទនារវាងគ្នាដ៏សែនល្អមួយ ដែលជាទូទៅស្តីអំពីរឿងផ្សេងៗ... វាគឺជាការនិយាយទូរស័ព្ទដ៏ល្អមែនទែន ហើយខ្ញុំពិតជាយល់ឃើញថា ពួកយើងបានពិភាក្សាគ្នាលើប្រធានបទជាច្រើន។ ម៉្យាងវិញទៀតក្រុមការងារនៃភាគទាំងសងខាងកំពុងចុះសម្រុងនឹងគ្នាយ៉ាងល្អ ហើយខ្ញុំក៏កំពុងតែត្រូវរ៉ូវគ្នាជាមួយលោក អូបាម៉ា ផងដែរ»។
គួរបញ្ជាក់ដែរនៅប៉ុន្មានម៉ោងមុនការហៅទូរស័ព្ទខាងលើលោក ដូណាល់ ត្រាំ បានបង្ហោះសារនៅលើបណ្តាញ Twitter ថា «កំពុងតែព្យាយាមយ៉ាងអស់ពីសមត្ថភាព ដោយមិនខ្វាយខ្វល់ពីឧបសគ្គក៏ដូចជាសេចក្តីថ្លែងការណ៍ដ៏ដុតរោលរបស់លោកប្រធានាធិបតី អូ (លោក បារ៉ាក់ អូបាម៉ា) ហើយយ៉ាងណាមិញវាមិនមែនជាការផ្ទេរតំណែងដែលប្រកបទៅដោយភាពរលូននោះឡើយ»។ លោក ត្រាំ នឹងស្បថចូលកាន់តំណែងជាផ្លូវការនៅថ្ងៃទី២០ ខែមករា ឆ្នាំ២០១៧ ខាងមុខនេះ៕
