(សេអ៊ូល)៖ អភិបាលក្រុងសុងណាម (Seongnam) នៃប្រទេសកូរ៉េខាងត្បូង​លោក លី ជែម្យុង (Lee Jae-myung) ដែលជាបេក្ខភាព​ប្រកួត​ប្រជែង​​​ដ៏មានសក្តានុ​ពល​មួយរូប សម្រាប់​ការបោះឆ្នោត​ជ្រើសរើស​ប្រធានាធិបតី​ថ្មីនាឆ្នាំ​ក្រោយ បានលើកឡើងនៅថ្ងៃព្រហស្បតិ៍​នេះថា អគ្គលេខាធិការ ​នៃអង្គការ​សហប្រជាជាតិ​លោក បាន គីមូន មិនសក្តិសមនឹងឈរឈ្មោះសម្រាប់មុខតំណែងជាមេដឹកនាំកំពូល នៃប្រទេស​កូរ៉េខាងត្បូង​នោះឡើយ ព្រោះថាលោក បាន បានទាញ​យកផលប្រយោជន៍​ពីតួនាទីបច្ចុប្បន្នរបស់លោក​សម្រាប់តែ​ការ​ចំណេញ​ផ្ទាល់ខ្លួន​ប៉ុណ្ណោះ។ នេះបើតាមការចេញផ្សាយ​ដោយ​ទីភ្នាក់ងារព័ត៌មាន​កូរ៉េខាងត្បូង យុនហ៉ាប់ នៅមុននេះបន្តិច​នាព្រឹក​ថ្ងៃព្រហស្បតិ៍ ទី២៩ ខែធ្នូ ឆ្នាំ២០១៦។

ថ្លែងនៅក្នុងបទសម្ភាសន៍​មួយជាមួយ​អ្នកសារព័ត៌មាន យុនហ៉ាប់ លោក លី ជែម្យុង បាននិយាយថា «លក្ខណៈ​វិនិច្ឆ័យ​ដ៏សំខាន់មួយ​ដែល​ចាំ​បាច់​​ សម្រាប់បណ្តា បេក្ខភាព​ឈរឈ្មោះ​ជាប្រធានាធិបតី គឺសមិទ្ធផល​របស់ពួកគេ​ដែលសម្រេចបានពីមុខតំណែងមុនៗ ហើយ​ថា​តើ​ពួក​គេ​បាន​ប្រើ​​ប្រាស់​​មុខ​តំណែង​ទាំង​នោះ ដើម្បីទាញយក​ផលប្រយោជន៍​ផ្ទាល់ខ្លួនដែរ​ឬយ៉ាងណា... ហើយបើនិយាយពីរឿងនោះ​លោក គីមូន គឺផ្ទុយ​ស្រឡះ​ពីរូបខ្ញុំ»។

គួរបញ្ជាក់ថា បច្ចុប្បន្នលោក បាន គីមូន និងគូប្រជែងមួយទៀត​កំពុងតែនាំមុខគ្នាយ៉ាងប្រកៀកប្រកិត​គ្នា ​នៅការស្ទង់មតិ​ដែលត្រូវបានធ្វើឡើង​ជាបន្តបន្ទាប់ នៅក្នុងប្រទេស​កូរ៉េខាងត្បូង​ស្តីអំពី​ការបោះឆ្នោត​ជ្រើសរើស​ប្រធានាធិបតីថ្មីនាឆ្នាំ២០១៧ ខណៈលោក លី ស្ថិតនៅលំដាប់ទីបី៕