(​អង់ការ៉ា)៖ ប្រធានាធិបតីតួកគី លោក Tayyip Erdogan (តាយយីប អឺដូហ្គាន់) បានថ្លែងថា សហរដ្ឋអាមេរិកមិនបានគោរព​តាម​ការ​សន្យា​ក្នុង​ការប្រយុទ្ធប្រឆាំងនឹងក្រុម ISIS​ នោះឡើយ​ហើយលោកថែមទាំង​អះអាងទៀតថា មាន​ភស្ដុតាង​ដែលអាចបញ្ជាក់​បានថា​ ទីក្រុងវ៉ាស៊ីនតោនពិតជាគាំទ្រក្រុមភេរវករជាច្រើននៅស៊ីរីយ៉ាងច្បាស់ក្រឡែត។ នេះបើតាមការចេញផ្សាយ​ដោយសារព័ត៌មាន Russian Today​ នៅរសៀលថ្ងៃពុធ ទី២៨ ខែធ្នូ ឆ្នាំ២០១៦។​

ថ្លែងនៅក្នុងសន្និសីទសារព័ត៌មាន​ជាមួយប្រធានាធិបតី​ហ្គីណេ លោក អាល់ហ្វា កុនដេ (Alpha Conde) ដែលបានបំពេញ​ទស្សនកិច្ច​មកកាន់ទីក្រុងអង់ការ៉ា លោក អឺដូហ្គាន់ លើកឡើងថា «វាពិតជារឿងអកុសល ដែលកងកម្លាំងចំរុះ​អន្តរជាតិដឹកនាំ​ដោយ​សហរដ្ឋអាមេរិក មិនបានគោរពតាម​ពាក្យសន្យា [...] ហើយជា​ការ​ពិតណាស់ ​បណ្ដាប្រទេស​លោកខាងលិច​រួមទំាង​សហរដ្ឋអាមេរិក បានគំាទ្រក្រុមឧទ្ទាម​ឃើដ PYD និងYPG​​ ព្រមទាំងក្រុម ISIS​ ផងដែរ។

ជាក់ស្ដែង​អាវុធ​ដែលក្រុមភេរវករ​ទាំងនេះកំពុងប្រើប្រាស់​ សុទ្ធតែ​ជាអាវុធផលិត​នៅបណ្ដាប្រទេស​លោកខាងលិច។ ទោះបីជាយ៉ាងណាក៏ដោយ បើទោះជាពួកគេមិនគោរពតាមពាក្យសន្យាក៏យើង​នឹងនៅតែ​បន្តដើរលើផ្លូវរបស់ពួកយើង​ជាមួយការបេ្ដជ្ញាចិត្ត​យ៉ាងរឹងមាំ»៕